नेकनूरच्या नदीपात्रातून वाळू उपसा

बीड : तालु्क्यातील नेकनूर परिसरातील सात्रा पोत्रा, चांदेगाव या नदीपात्रात वाळूतस्करांनी उच्छाद मांडला आहे. रात्रीच्या वेळी जेसीबीच्या साहाय्याने वाळूचा उपसा करून टिपर व ट्रॅक्टरने वाहतूक केली जात आहे. याकडे महसूल विभाग व पोलिसांचे दुर्लक्ष होत असल्याने शासनाला मोठा भुर्दंड सहन करावा लागत आहे. परिसरातील नागरिक वाळू उपसा बंदीची मागणी करीत आहेत.

शेती सिंचन अडचणीत

अंबाजोगाई : वीज वितरण कंपनीच्या गलथान कारभारामुळे अंबाजोगाई तालुक्यातील ग्रामस्थ त्रस्त झाले असून, शेतीला पाणी देण्यास अडचणी येत आहेत. वेळी-अवेळी वीज खंडित होत असल्याने नागरिकांना मोठा त्रास सहन करावा लागत आहे.

सूचनांचे पालन गरजेचे

बीड : पहिल्या टप्प्यात नागरिकांच्या सहकार्याने कोरोनावर मात करता आली. आता नव्याने पुन्हा नव्याने हे आव्हान समोर येत असून, यासाठी मास्क, सामाजिक अंतर सॅनिटायझरचा वापर आवश्यक आहे; परंतु नागरिकांमध्ये याबाबत जागृती अद्यापही दिसेनासी झाली आहे.

गॅसचा गैरवापर

बीड : घरगुती तथा व्यावसायिक वापराच्या गॅस सिलिंडरचा अंबाजोगाई तालुक्यात काही लोकांनी गोरखधंदा सुरू केला आहे. अंबाजोगाई शहरातून स्वत:च्या नावावर गॅस घेऊन त्या सिलिंडरची विक्री चढ्या भावाने व्यावसायिकांना केली जाते.

पुलांचे कठडे गायब

बीड : तालुक्यात अनेक ठिकाणी पुलांना बसविण्यात आलेले लोखंडी कठडे गायब झाले आहेत. अनेक मद्यपी अथवा चोरट्यांनी पुलाला बसविलेले लोखंडी पाइप तोडून भंगारमध्ये नेऊन विकले. त्यामुळे वाहनांना पुलावरून जाताना धोका निर्माण होत आहे.

इंटरनेट विस्कळीत

बीड : मागील काही दिवसांपासून बीड शहरात बीएसएनएलची इंटरनेट सेवा विस्कळीत झाली आहे. इंटरनेटला स्पीड मिळत नसल्याने ग्राहक वैतागले आहेत. तक्रारी केल्या; परंतु त्यांची दखल घेतली जात नसल्याचे दिसते.