रोटरी क्लब बीड सिटी अध्यक्षपदी प्रदीप शेटे, सचिवपदी संध्या मिश्रा

बीड : रोटरी क्लबला समाजसेवेचा समृद्ध वारसा लाभलेला असून, त्यांचे सातत्यपूर्ण समाजकार्य हे स्तुत्य आणि अनुकरणीय आहे, असे गौरवोद्गार डॉ. लक्ष्मीकांत बाहेगव्हाणकर यांनी काढले. त्यांना रोटरी क्लब ऑफ बीड सिटीच्या वतीने दीपस्तंभ पुरस्कार देण्यात आला. या कार्यक्रमात रोटरी क्लबचे नूतन अध्यक्ष म्हणून प्रदीप शेटे, तर सचिव म्हणून संध्या मिश्रा यांनी पदभार स्वीकारला.

रोटरी क्लब बीड सिटी ही बीड शहरातील नामांकित सामाजिक संघटना असून सामाजिक कार्यात सतत अग्रेसर असते. सामाजिक, शैक्षणिक, आरोग्य, आदी क्षेत्रात आतापर्यंत रोटरी क्लब बीड सिटीने भरीव कामगिरी केली आहे. १ जुलै रोजी रोटरी क्लब ऑफ बीड सिटीने नवीन वर्षात पदार्पण केले असून, मावळते अध्यक्ष सचिन लातूरकर व मावळते सचिव सुजित सूर्यवंशी यांनी आपला पदभार नूतन अध्यक्ष प्रदीप शेटे व नूतन सचिव संध्या मिश्रा यांच्याकडे सुपूर्त केला.

ईश्वर मुथा यांनी क्लब ट्रेनर म्हणून, तर सुजित सूर्यवंशी, सचिन लातूरकर, गणेश मैड, मंगेश नागणे, प्रवीण पटेल, संतोष रेवणवार, सीए गोपाल मालू, सुदर्शन हेरकर, विठ्ठल वीर, अक्षय मुळे, राजेंद्रसिंह चौहान, मिलिंद सुंदर, सचिन महाजन, आदींची संचालक मंडळात निवड करण्यात आली. मानद संचालक म्हणून अरुण बरकसे आणि महेश वाघमारे यांना निवडण्यात आले.

एका समारंभात सावरकर साहित्याचे अभ्यासक तथा स्वा. सावरकर महाविद्यालयाचे उपप्राचार्य डॉ. लक्ष्मीकांत बाहेगव्हाणकर यांना दीपस्तंभ पुरस्कार देऊन गौरविण्यात आले. कार्यक्रमास प्रमुख पाहुणे म्हणून ज्ञानेश्वर तांबे व अक्षय शेटे उपस्थित होते. यावेळी मावळत्या आणि नूतन अध्यक्षांनी आपले मनोगत व्यक्त केले. कार्यक्रमाचे सूत्रसंचालन सचिन महाजन यांनी केले. आभार प्रदर्शन गणेश मैड यांनी केले. सकाळी रोटरी क्लब बीड सिटीतर्फे डॉक्टर्स डे, सी.ए. डे, कृषी दिन साजरा करण्यात आला. या निमित्ताने डॉ. सवासे, सी.ए. नहार यांचा गौरव करण्यात आला.

060721\06bed_11_06072021_14.jpg

रोटरी क्लब