माजलगाव : मतदारसंघातील कोविड परिस्थितीसंदर्भात व येणाऱ्या संभाव्य कोविड लाटेबाबत आणि स्वस्त धान्यवाटपातील गैरव्यवहार रोखण्यासाठी उपाययोजना करा, अशा स्पष्ट सूचना आढावा बैठकीत आ. प्रकाश सोळंके यांनी संबंधित अधिकारी, कर्मचाऱ्यांना दिल्या. कोरोनाबाबतही अधिकारी, कर्मचाऱ्यांनी कर्तव्यात कसूर करू नये, याबाबतही संबंधितांना आमदार सोळंके यांनी धारेवर धरले.
येथील तहसील कार्यालयाच्या सभागृहात गुरुवार रोजी झालेल्या आढावा बैठकीला आमदार प्रकाश सोळंके यांच्यासह बीड जिल्हा परिषदेचे सभापती जयसिंग सोळंके, समाजकल्याण सभापती कल्याण आबूज, पंचायत समिती सभापती भागवतराव खुळे, पंचायत समिती सदस्य शशांक सोळंके, जयदत्त नरवडे, नगरसेवक भागवतराव भोसले, उपविभागीय अधिकारी नम्रता चाटे, वैद्यकीय अधीक्षक डाॅ. सुरेश साबळे, तालुका अधिकारी डाॅ. मधुकर घुबडे, गटविकास अधिकारी प्रज्ञा माने आणि कर्मचारी, आदी उपस्थित होते.
आमदार सोळंके म्हणाले, कोरोनाकाळात अधिकारी आणि कर्मचाऱ्यांनी रुग्णांच्या हितासाठी प्रयत्न करावेत. शासकीय रुग्णालयातील उपचार पद्धती आणि सेवा याचे कौतुक करतानाच खासगी रुग्णालयांनी कोविडबाबत दर्जेदार सेवा पुरविण्याची गरज आहे. काही खासगी रुग्णालये भरमसाट बिले आकारत असल्याचेही निदर्शनास आल्याचे सोळंके म्हणाले. खाजगी रुग्णालयातील बिलांचे ऑडिट होणे गरजेचे आहे. याबाबत संबंधितांना निर्देश देण्यात आले. संजय गांधी, श्रावणबाळ निराधार योजनेंतर्गत मिळणारे मानधन वेळेवर लाभार्थ्यांना मिळत नाही. काही ठिकाणी बँकेत रक्कम वर्ग झाल्यानंतर बँक कर्मचारी उदासीनपणा दाखवून अडथळा आणत आहेत, याबाबतही संबंधितांना धारेवर धरत या योजनेमध्ये सुसूत्रता आणण्याची गरज असल्याचे सोळंके म्हणाले.
===Photopath===
270521\2302purusttam karva_img-20210527-wa0057_14.jpg