सीएसच्या तोंडाला काळं फासणारच्या अफवेने पोलिसांची धावपळ

बीड : जिल्हा शल्यचिकित्सकांच्या तोंडाला काळे फासणार, अशी माहिती बीड शहर पोलिसांना मिळाली होती. त्यानंतर दीपक थोरात या सामाजिक कार्यकर्त्याला पोलिसांनी ताब्यात घेत ठाण्यात बसविले. केवळ पोलिसांना पुढे करून सामाजिक कार्य करणाऱ्या लोकांना आणि जिल्हा छुग्णालयाचा कारभार चव्हाट्यावर आणणाऱ्यांचा आवाज दाबण्याचा हा प्रयत्न आरोग्य विभागाकडून अप्रत्यक्षरित्या केला जात असल्याचे दिसत आहे.

दीपक थोरात हे रविवारी दुपारी जिल्हा रुग्णालयात एका ओळखीच्या रुग्णाला भेटण्यासाठी आले होते. याच दरम्यान माजी मंत्री जयदत्त क्षीरसागर हेदेखील एका कार्यक्रमासाठी जिल्हा रुग्णालयात आले होते. त्यांच्यासमोर दीपक थोरात हे जिल्हा शल्यचिकित्सक डॉ. सूर्यकांत गीते यांच्या तोंडाला काळे फासणार असल्याची अफवा पसरवण्यात आली. त्यानंतर बीड शहर पोलिसांनी धाव घेत तात्काळ थोरात यांना ताब्यात घेत ठाण्यात आणून बसविले. सायंकाळी ५ वाजेपर्यंत ते ठाण्यातच होते.

दरम्यान, थोरात यांच्याकडून जिल्हा रूग्णालयातील गलथान कारभाराविरोधात नेहमीच आवाज उठविला जातो. काही दिवसांपूर्वीच रेमडेसिविर काळाबाजार आणि वॉर्डबॉय भरती प्रक्रियेत अतिरिक्त जिल्हा शल्यचिकित्सक डॉ.सुखदेव राठोड यांनी पैसे घेतल्याचा आरोप करत तक्रार केली होती. त्यानंतर काही गुंडांकडून त्यांच्यावर हल्लाही झाला होता. हा हल्ला डॉ.राठोडनेच केला, असा आरोप करत थोरात यांनी त्यांच्या कक्षात जावून आत्मदहन करण्याचा प्रयत्न केला होता. सात दिवस अतिदक्षता कक्षात त्यांच्यावर उपचार सुरू होते. आता पुन्हा त्यांच्यावर पोलिसांमार्फत दबाव टाकण्याचा प्रयत्न केला जात असल्याचा आरोप होत आहे. हा आवाज दाबण्याचा प्रयत्न असल्याचे थोरात म्हणाले.

....

दीपक थोरात हे जिल्हा शल्यचिकित्सकांच्या तोंडाला काळे फासणार अशी गोपनीय माहिती मिळाली होती. त्यामुळे तत्काळ पथक पाठवून त्यांना ताब्यात घेण्यात आले. आता चौकशी सुरू असून योग्य ती कारवाई केली जाईल.

-रवी सानप, पोलीस निरीक्षक, बीड शहर.

...

मी ओळखीच्या रुग्णाला भेटायला आलो होतो. एवढ्यात पोलिसांनी मला ठाण्यात आणले. हे सर्व कटकारस्थान सीएस व एसीएस यांचेच आहे. आवाज दाबण्याचा हा प्रयत्न आहे. असे असले तरी या दोघांचे गैरकारभार समाजासमोर आणल्याशिवाय शांत राहणार नाही.

-दीपक थोरात, सामाजिक कार्यकर्ते.

....

मी पोलिसांना फोन केला नाही. मला याबाबत काहीच माहिती नाही.

-डॉ.सूर्यकांत गीते, जिल्हा शल्यचिकित्सक, बीड.

===Photopath===

230521\23_2_bed_11_23052021_14.jpeg

===Caption===

दीपक थोरात यांना बीड शहर ठाण्यात आणण्यात आले होते.