हॉटेल कर्मचाऱ्यांचे लसीकरण पूर्ण झाले आहे का रे भाऊ...?

बीड : जिल्ह्यात सध्या कोरोना लसीचा प्रचंड तुटवडा आहे. त्यातच हॉटेल उघडण्यास रात्री १०पर्यंत परवानगी दिली आहे. असे असले तरी हॉटेलचालक व कामगारांचे लसीकरण अद्यापही पूर्णपणे झाले नसल्याचे दिसते. याला कामगारांचा अनुत्साहासह लसीचा तुटवडा कारण असल्याचे समोर आले आहे. सर्वांनी लस घेण्याची आवाहन करण्याबरोबरच मुबलक लस उपलब्ध करून देण्याची मागणी होत आहे.

जिल्ह्यात आतापर्यंत सात लाख लोकांना कोरोनाची लस देण्यात आली आहे. लाभार्थी संख्या जवळपास २१ लाखांच्या वर असल्याचे आरोग्य विभागाकडून सांगण्यात येत आहे. लसीकरण करण्यासाठी पूर्ण नियोजन केले जात असले तरी लस मुबलक प्रमाणात उपलब्ध होत नसल्याचे वास्तव बीडमध्ये आहे. त्यातच आता लॉकडाऊनचे निर्बंध शिथिल केल्याने सर्वत्रच गर्दी होत आहे. त्यामुळे सर्वांनी लसीकरण करणे गरजेचे आहे. यात हॉटेलचालक व कामगारांचा आढावा घेतला असता अनेकांचे लसीकरण झालेले नसल्याचे समोर आले. त्यामुळे कोरोना पसरण्यासह त्यांनाही धोका पोहोचण्याची शक्यता नाकारता येत नाही. या कामगारांनी लस घ्यावी तर शासनाने लस मुबलक प्रमाणात उपलब्ध करून द्यावी, अशी मागणी होत आहे.

---

टपरीवर आनंदी आनंद

बीड शहरात गल्ली बोळांसह चौकाचौकात टपऱ्या थाटल्या आहेत. येथे कोणीही मास्कचा वापर करत नाही. शिवाय सार्वजनिक ठिकाणी थुंकून काही लोक सर्वत्र घाण करत असल्याचे दिसत आहे. या टपरी चालकांनीही लस घेतली नसल्याचे अनेक ठिकाणी सांगण्यात आले. सर्वत्र आनंदी आनंद असून त्यांना कोरोनाची कसलीच भीती नसल्याचे दिसते.

---

शासनाकडून जशी लस उपलब्ध होईल तसा केंद्रांना पुरवठा केला जात आहे. हॉटेल चालक, कामगारांची स्वतंत्र नोंद केली जात नाही. सर्वांनाच लस घ्यावी, असे आवाहन केले जात आहे.

-डॉ. बाबासाहेब ढाकणे, नोडल अधिकारी, बीड

....

शहरातील हाॅटेल्स १५०

सुरू असलेले हॉटेल्स १२०

कामगार संख्या १२००

...