कँटरमधून आठ लाखांचा गुटखा पकडला

गेवराई : पंजाबकडून तमिळनाडूकडे जाणाऱ्या कँटरमधून वाहतूक केला जाणारा सुमारे आठ लाख १६ हजारांचा तंबाखू व गुटखा पकडून जप्त करण्यात आला. पाडळसिंगी टोलनाक्यावर मंगळवारी (दि. १) रात्री दहा वाजण्याच्या सुमारास उपविभागीय पोलीस अधिकारी व गेवराई पोलिसांनी ही कारवाई केली. चालकाला अटक करून गेवराई पोलीस ठाण्यात उशिरापर्यंत गुन्हा दाखल करण्याची प्रक्रिया सुरू होती.

सध्या लाॅकडाऊन असल्याने जागोजागी चेकपोस्ट उभारण्यात आल्या आहेत. मंगळवारी पंजाबहून तमिळनाडूकडे जाणारा कँटर (केए१४ सी २५१३) पाडळसिंगी टोलनाक्यावर आला असता त्याची झडती घेण्यात आली. यात गुटखा व तंबाखू असल्याचे दिसताच तो येथील पोलीस ठाण्यात लावण्यात आला. बुधवारी दुपारी तीनच्या सुमारास कँटरमधील तंबाखू व गुटख्याची मोजणी करण्यात आली. यात ३० किलोंची तंबाखूची १८० पोती व गुटख्याचे ८० पुडे असलेले १६० बाॅक्स असा तब्बल आठ लाख १६ हजारांचा मुद्देमाल जप्त करून कारवाई करण्यात आली. उपविभागीय पोलीस अधिकारी स्वप्निल राठोड, सहायक पोलीस निरीक्षक प्रफुल्ल साबळे, पोलीस उपनिरीक्षक युवराज टाकसाळसह अनेकजण या कारवाईत सहभागी झाले होते. यात कँटरचालक संदीप बारीकरमाने याला अटक केली असून, या प्रकरणी गेवराई पोलीस ठाण्यात उशिरापर्यंत गुन्हा दाखल करण्याची प्रक्रिया सुरू होती.

===Photopath===

020621\20210602_140213_14.jpg