अंबाजोगाई : कोरोनाच्या सावटामुळे सामाजिक वातावरण बिघडले आहे. सार्वजनिक कार्यक्रमांवर मोठ्या प्रमाणात निर्बंध लादले गेले. या काळात शेतीमालाचे भाव मोठ्या प्रमाणात गडगडले, त्यात भर म्हणजे अतिवृष्टीने या परिसरातील शेतकऱ्यांचे मोठ्या प्रमाणात नुकसान झाले. त्यातच वाढत्या महागाईचा सर्वाधिक फटका शेतकऱ्यांना बसला आहे.
वन्य प्राण्यांचा उपद्रव वाढला
अंबाजोगाई : अंबाजोगाई तालुक्यात ग्रामीण भागात वन्यप्राणी रानडुक्कर, हरिण यांची संख्या मोठ्या प्रमाणात वाढली आहे. हे प्राणी सध्या परिसरात उभ्या असणाऱ्या ज्वारी व उसाची मोठ्या प्रमाणात नुकसान करीत आहेत. हरणांची मोठी कळपं या भागात मोठ्या प्रमाणात निर्माण झाली आहेत. त्यांचा पिकांवर सुरू असलेला मुक्तसंचार धोकादायक ठरू लागला आहे. या वन्य प्राण्यांचा वनविभागाने बंदोबस्त करावा, अशी मागणी भाजपचे तालुकाध्यक्ष अच्युतराव गंगणे यांनी केली आहे.
शहर बससेवा सुरू करा
अंबाजोगाई : अंबाजोगाई शहराची व्याप्ती मोठ्या प्रमाणात वाढली आहे. यशवंतराव चव्हाण चौक ते भगवानबाबा चौक असा मोठा पल्ला शहरवासीयांना पार करावा लागतो. भगवानबाबा चौक ते यशवंतराव चव्हाण चौक या भागात स्वा.रा.ती. रुग्णालयामार्गे शहर वाहतूक बससेवा सुरू झाल्यास शहरवासीयांची मोठी सोय होणार आहे. पूर्वी सुरू झालेली ही सेवा बंद झाली आहे. ती पूर्ववत सुरू करावी, अशी मागणी सामाजिक कार्यकर्ते डॉ. नरेंद्र काळे यांनी केली आहे.
वृक्षतोडीकडे दुर्लक्ष
अंबाजोगाई : अंबाजोगाई शहर परिसरात वनविभागाची मोठी झाडी आहे. या परिसरात गेल्या अनेक दिवसांपासून वृक्षतोड मोठ्या प्रमाणात सुरू आहे. सरपणासाठी लोक झाडांचे फाटे तोडून नेत आहेत. याकडे स्थानिक प्रशासन व वनविभागाचे दुर्लक्ष होऊ लागले आहे.
उन्हाची तीव्रता वाढली
अंबाजोगाई : अंबाजोगाई तालुक्यात दिवसेंदिवस उन्हाचा पारा वाढतच चालला आहे. परिणामी दुपारच्या वेळी रस्त्यांवर शुकशुकाट दिसून येत आहे. सकाळी १० वाजल्यापासून उन्हाचे चटके जाणवू लागले आहेत. सायंकाळपर्यंत उन्हाची तीव्रता कायम राहत आहे. वाढत्या उन्हामुळे थंडपेयाची मागणी व उन्हापासून संरक्षण करणारे कपडे, उपरणे, टोप्यांची विक्री सुरू झाली आहे.