‘त्या’ शिक्षकांच्या कुटुंबीयांना मिळणार ५० लाखांचे सानुग्रह अनुदान

अंबाजोगाई : कोविड-१९मुळे जे शिक्षक, कर्मचारी मयत झालेले असतील त्यांच्या वारसदारांनी सानुग्रह अनुदान मिळण्यासाठी तत्काळ प्रस्ताव सादर करावा, असा आदेश बीड जिल्हा परिषदेचे शिक्षणाधिकारी यांनी २१ मे २०२१ रोजी जारी केला आहे.

कोविडमुळे मयत शिक्षकांच्या कुटुंबीयांना ५० लाख रुपयांचे सानुग्रह अनुदान मिळण्यासाठी बीड जिल्ह्यातील सर्व पंचायत समिती व गटशिक्षणाधिकारी स्तरावर लवकरात लवकर कार्यवाही करून मृत शिक्षकांच्या कुटुंबीयांना मदत व लाभ मिळवून द्यावा, अशी मागणी शिक्षक मैत्री प्रतिष्ठानचे अध्यक्ष विजय रापतवार यांच्या वतीने करण्यात आली आहे.

कोरोना महामारीवर मात करण्यासाठी राज्यासह बीड जिल्ह्यात विविध ठिकाणी आरोग्य यंत्रणांच्या मदतीला शिक्षकांची नियुक्ती केली आहे. परंतु, कर्तव्य बजावत असताना मागील एक वर्षापासून आजतागायत बीड जिल्ह्यात अनेक शिक्षक बांधव मृत्युमुखी पडले आहेत. मात्र, त्यांच्या कुटुंबीयांना ५० लाख रुपयांचे सानुग्रह अनुदान न मिळाल्याने त्यांची परवड होत आहे. यामुळे या काळात कर्तव्य बजावणार्‍या शिक्षकांना 'फ्रंटलाइन वर्कर' म्हणून तत्काळ मान्यता द्यावी आणि या कुटुंबीयांना ५० लाख रुपये सानुग्रह अनुदान मिळण्याची कार्यवाही तत्काळ करून दिलासा द्यावा, अशी मागणी रापतवार यांनी केली आहे.