निष्काळजीपणाचा कळस; बाधितावर नॉनकोविड वॉर्डात उपचार

बीड : विषारी द्रव प्राशन केलेल्या तरुणाचा कोरोना रिपोर्ट पॉझिटिव्ह आल्यानंतरही त्याच्यावर दोन दिवस नॉनकोविड रुग्णालयात उपचार करण्यात आले. त्याच्यावर कोरोनाचे उपचार न झाल्यानेच त्याचा मृत्यू झाल्याचा आरोप नातेवाइकांनी केला आहे. दुसऱ्या बाजूला रिपोर्टबद्दल प्रशासन किती गाफील आहे, पुन्हा एकदा समोर आले आहे. यानिमित्ताने जिल्हा रुग्णालयाचा हलगर्जीपणा चव्हाट्यावर आला आहे.

बीड तालुक्यातील पारगाव येथील २५ वर्षीय तरुणाने २७ मे रोजी सायंकाळी सहा वाजता विषारी द्रव प्राशन केले होते. त्यास जिल्हा रुग्णालयाच्या स्थलांतरित आदित्य अभियांत्रिकी महाविद्यालयात दाखल केले. २८ मे रोजी त्याची अँटिजन चाचणी निगेटिव्ह आल्याने त्याच दिवशी आरटीपीसीआरसाठी स्वॅब घेतला. ३० रोजी त्याचा अहवाल पॉझिटिव्ह आला. मात्र, यंत्रणेच्या गोंधळात तो बाधित असल्याचे कोणाच्याही लक्षात आले नाही. दोन दिवस त्याच्यावर विषारी द्रव प्राशन केल्याच्या अनुषंगानेच उपचार सुरू होते. बुधवारी पहाटे त्याचा मृत्यू झाला. त्यानंतर कुटुंबीयांनीच त्याचा अहवाल जिल्हा रुग्णालयाच्या मदत केंद्रातून मिळवला. तो पॉझिटिव्ह असल्याचे रुग्णालय प्रशासनाच्या निदर्शनास आणून दिले. रुग्णालय प्रशासनाने त्यानंतर मृतदेह नातेवाइकांच्या ताब्यात न देता पालिकेमार्फत अंत्यसंस्कार उरकले. मयत तरुणाच्या वडिलांनी जिल्हा रुग्णालय चौकीत जवाब नोंदविला. या प्रकाराने मात्र आरोग्य विभागाचा आणखी एक गलथान कारभार चव्हाट्यावर आला आहे.

या प्रकरणात नेमके कोण दोषी आहेत, याची माहिती घेत आहे. स्वॅब दिल्यानंतर अलगीकरणात का उपचार केले नाहीत व अहवाल पॉझिटिव्ह असल्याचे समजायला दोन दिवस कसे लागले, याची चौकशी करण्यात येईल. नॉनकोविड वॉर्डमधील इतर रुग्ण व त्यांच्यावर उपचार करणाऱ्यांचेही स्वॅब घेतले जातील.

डॉ. सूर्यकांत गित्ते, जिल्हा शल्यचिकित्सक, बीड

--कोरोना चाचणीसाठी स्वॅब दिल्यानंतर तरुणाला अलगीकरणात का ठेवले नाही, तो पॉझिटिव्ह येऊनही दोन दिवस यंत्रणा गाफील कशी काय राहते? याबाबत दोषींवर सदोष मनुष्यवधाचा गुन्हा नोंद करावा तसेच जिल्हा शल्यचिकित्सक यांनाही आरोपी करावे. त्याच्यावर कोरोनाच्या अनुषंगाने योग्य ते उपचार न झाल्यानेच त्याचा मृत्यू झाला आहे.

राजेंद्र आमटे, नातेवाईक