चाळिशीनंतर वाहन परवान्यासाठी द्यावे लागते फिट असल्याचे प्रमाणपत्र

अविनाश मुडेगावकर/

लोकमत न्यूज नेटवर्क

अंबाजोगाई : वैद्यकीय तपासणीसाठी आवश्यक असे एकही साहित्य नाही. ना डोळ्यांची तपासणी, ना कानाची तपासणी. तरीही चालक वैद्यकीयदृष्ट्या फिट असल्याचे प्रमाणपत्र प्रादेशिक परिवहन कार्यालयाच्या परिसरात झेरॉक्स सेंटरवर मिळते. रस्त्यावर धावणाऱ्या लाखो लोकांचा जीव हाती असणारा चालक सक्षम असल्याचा दाखला देण्याची ही पद्धत धोकादायक ठरणारी आहे.

वयाची चाळिशी गाठलेल्यांना वाहन परवाना काढण्यासाठी चालक हा शारीरिकदृष्ट्या सुदृढ असावा. असा नियम आहे. हे सिद्ध करण्यासाठी ‘एमबीबीएस’ डॉक्टरांचे वैद्यकीय प्रमाणपत्र आवश्यक असते. आरटीओ कार्यालयाच्या परिसरात बसून असे प्रमाणपत्र देणारे अनेक डॉक्टर आहेत. केवळ १०० रुपये देऊन अर्जदाराचा फोटो चिटकवून कुठलीही समस्या नसल्याचे स्वाक्षरी व शिक्का मारून प्रमाणपत्र दिले जात आहे. मागील अनेक वर्षांपासून हा प्रकार बिनबोभाट सुरू आहे. कार्यालयापेक्षा कार्यालया बाहेरच अनेक कामे बिनबोभाट होतात. जर कार्यालयात कामासाठी गेलेच तर हेलपाटे मारण्याची वेळच येते. मात्र, हेच काम दलालामार्फत अगदी कांही वेळातच होते. अशीच जणूकाही कामाची पद्धत बनली आहे.

.....

ना कानांची, ना डोळ्यांची तपासणी

आरटीओ कार्यालयाच्या परिसरातील झेरॉक्स सेंटरवर बसून वैद्यकीय प्रमाणपत्र देणारे हे डॉक्टर खरोखरच डॉक्टर आहेत का? हा प्रश्न आहे. ते ना कानांची, ना डोळ्यांची तपासणी करतात. पैसे दिल्यास ते कोणालाही प्रमाणपत्र देत असल्याचे वास्तव आहे.

...

‘एमबीबीएस’ डॉक्टरांचेच प्रमाणपत्र

पूर्वी आयुर्वेदिक किंवा होमिओपॅथी डॉक्टरही हे प्रमाणपत्र द्यायचे. परंतु यावर आक्षेप घेण्यात आल्यानंतर केवळ ‘एमबीबीएस’ असलेल्या डॉक्टरांचेच प्रमाणपत्र ग्राह्य धरले जाते. एका डॉक्टरला दिवसांतून जास्तीत २० प्रमाणपत्रे देता येतात.

...

....यांना द्यावे लागते वैद्यकीय प्रमाणपत्र

वयाची चाळिशी ओलांडलेल्या प्रत्येक अर्जदाराला वाहन परवाना काढण्यासाठी वैद्यकीय प्रमाणपत्र द्यावे लागते. याशिवाय, आंतरराष्ट्रीय वाहन परवाना किंवा वाहन परवान्याच्या नूतनीकरणासाठी हे प्रमाणपत्र जोडावे लागते. विशेष म्हणजे, वयाच्या पन्नाशीनंतर दर पाच वर्षांनी वाहन परवान्याचे नूतनीकरण करताना वैद्यकीय प्रमाणपत्र द्यावे लागते.

....

वयाची चाळिशी गाठलेल्यांना नव्या वाहन परवान्यासाठी किंवा परवान्याच्या नूतनीकरणासाठी किंवा आंतरराष्ट्रीय वाहन परवान्यासाठी एमबीबीएस असलेल्या डॉक्टरांचे वैद्यकीय प्रमाणपत्र गरजेचे असते. त्याशिवाय ती प्रक्रिया पूर्ण होत नाही.

-दत्तात्रय सांगोलकर, उपप्रादेशिक परिवहन अधिकारी, अंबाजोगाई.

.....

वितरित झालेले वाहन परवाने

सन-२०१९-२०

लर्निंग-३७९०४

पर्मनंट-११६००

सन-२०००-२०२१

लर्निंग-३२७९३

पर्मनंट-१०१४१

सन-२०२१

लर्निंग-१८०६

पर्मनंट-९८९