बीड: ग्रामपंचायत निवडणुकीत मतदानाचा हक्क बजावण्यासाठी दुचाकीवरुन गावी निघालेल्या तरुणाला टेम्पोने जोराची धडक दिली, त्यानंतर तो उडून रस्त्यावर पडला. यावेळी भरधाव टिप्परने त्यास चिरडले. ही हृदयद्रावक घटना पुणे- नगर रोडवरील रांजणगावजवळ घडली. सुनील भगवान डुकरे (२८,रा.सिरसमार्ग ता.गेवराई) असे मृत तरुणाचे नाव आहे. तो रांजणगाव (जि.पुणे) येथे खासगी कंपनीत नोकरी करायचा.
सिरसमार्ग येथे ग्रामपंचायतच्या पंचवार्षिक निवडणुकीसाठी ४ ऑगस्ट रोजी मतदान झाले. मतदानाचा हक्क बजावण्यासाठी तो दुचाकीवरुन ४ ऑगस्ट रोजी सकाळी सात वाजता गावी निघाला होता. रांजणगावजवळ भरधाव टेम्पोने त्याच्या दुचाकीला धडक दिली , यानंतर तो रस्त्यावर कोसळला. याचदरम्यान समोरुन येणारे टिप्पर त्याच्या अंगावरुन गेले. त्यामुळे त्याचा दुर्दैवी अंत झाला. या घटनेची माहिती मिळाल्यावर ग्रामस्थ व नातेवाईकांनी रांजणगावला धाव घेतली. सायंकाळी सिरसमार्ग येथे अंत्यसंस्कार करण्यात आले.