रस्त्यावर उतरणार इलेक्ट्रिक 'ऑटोप्लेन'! एकदा चार्ज केल्यास २०० किमी धावणार, किंमत... 

महिंद्रा उडोचे डिझाइन विमानातून प्रेरित असून कंपनीने या ऑटोला ‘ऑटोप्लेन’ या संकल्पनेतून साकारले आहे

मुंबई - देशातील अग्रगण्य व्यावसायिक वाहन उत्पादक कंपनी महिंद्रा गुपची सब्सिडियरी कंपनी महिंद्रा लास्ट मोबिलिटी कंपनीने मार्केटमध्ये नवीन इलेक्ट्रिक थ्री व्हिलर लॉन्च केली आहे. कंपनीने या इलेक्ट्रिक ऑटोमध्ये अनेक खास फिचर्स दिले आहेत जे याला इतर ई ऑटोपेक्षा वेगळे बनवतात. कंपनीने Mahindra UDO या नावाने ही इलेक्ट्रिक ऑटो बाजारात आणली आहे. 

महिंद्रा उडोचे डिझाइन विमानातून प्रेरित असून कंपनीने या ऑटोला ‘ऑटोप्लेन’ या संकल्पनेतून साकारले आहे. याचे डिझाइन, परफॉर्मन्स आणि आराम या तिन्ही गोष्टींची विशेष काळजी घेतली आहे. या इलेक्ट्रिक ऑटोची सुरुवातीची किंमत ३ लाख ८४ हजार २९९ इतकी निश्चित करण्यात आली आहे. मात्र मर्यादित कालावधीसाठी याची किंमत ३ लाख ५८ हजार ९९९  या विशेष किमतीत उपलब्ध असणार आहे. ऑटोमध्ये ड्रायव्हर आणि पॅसेंजरच्या कन्फर्टकडे लक्ष देण्यात आले आहे. भारतात थ्री व्हिलर सेगमेंट हे सर्वात मोठे मार्केट आहे. १९४८ पासून पारंपारिक ऑटो डिझाइनमध्ये चालक आणि प्रवाशांच्या आरामाकडे फारसे लक्ष देण्यात आले नव्हते. मात्र  उडोचे आकर्षक, एरोडायनॅमिक डिझाइन, दमदार हेडलॅम्प्स, स्टायलिश मिरर्स आणि मोठे विंडशील्ड यामुळे रस्त्यावर त्याची झलक अधिक प्रभावी आणि वेगळी ठरते.

ऑटोप्लेनच्या आतील रचना देखील तितकीच विचारपूर्वक करण्यात आली आहे. चालक आणि प्रवाशांच्या आरामाला केंद्रस्थानी ठेवून एर्गोनॉमिक डिझाइनची आसनव्यवस्था देण्यात आली आहे. चालकासाठी विशेष ‘पायलट सीट’ देण्यात आली असून ती या सेगमेंटमधील इतर वाहनांच्या तुलनेत सुमारे २० टक्के अधिक जाड आणि अधिक आरामदायी आहे. प्रवाशांसाठी ‘फर्स्ट-क्लास’ आसनव्यवस्था देण्यात आली आहे. अधिक लेगरूम आणि हेडरूममुळे लांब प्रवासातही लाउंजसारखा आरामदायी अनुभव मिळतो. खडबडीत रस्त्यांवरही अधिक स्थिरता आणि स्मूथ राइड मिळावी यासाठी स्वतंत्र रिअर सस्पेन्शन आणि ड्युअल-फोर्क फ्रंट सस्पेन्शनची सुविधा देण्यात आली आहे.

काय आहेत फिचर्स?

महेंद्रा उडो सिंगल चार्जमध्ये २०० किमीपर्यंत रेंज देते. यामध्ये IP67-रेटेड 11.7 kWh लेझर-वेल्डेड लिथियम-आयन बॅटरी पॅक देण्यात आला आहे. PMS मोटरमुळे १० kW पीक पॉवर आणि ५२ Nm टॉर्क मिळतो, ज्यामुळे वाहनाला दमदार गती आणि ताकद मिळते. उडोमध्ये रिजनरेटिव्ह ब्रेकिंगची सुविधा असून सेगमेंटमध्ये पहिल्यांदाच देण्यात आलेल्या रिव्हर्स थ्रॉटलसोबत मिळून ब्रेक न दाबताही सहज गती नियंत्रण शक्य होते. रिव्हर्स थ्रॉटलमुळे रेंज वाढण्यास मदत होते तसेच अधिक स्मूथ राइड अनुभव मिळतो.

हिल होल्ड असिस्ट आणि क्रीप फंक्शनमुळे चढावावर स्थिरता राखणे आणि बंपर-टू-बंपर ट्रॅफिकमध्ये सहज ड्रायव्हिंग करणे शक्य होते. ‘रेंज’, ‘राइड’ आणि ‘रेस’ या थ्रीमोड ड्रायव्हिंग सिस्टीममुळे चालकांना ट्रॅफिक परिस्थितीनुसार कार्यक्षमतेत आणि परफॉर्मन्समध्ये संतुलन साधता येते.‘रेस’ मोडमध्ये ५५ किमी/तास इतका टॉप स्पीड मिळत असल्याने फेऱ्या जलद पूर्ण करून अधिक उत्पन्न कमावण्याची संधी चालकांना मिळेल. १ लाखापर्यंत फ्री सर्व्हिस कंपनीकडून देण्यात येणार आहे. महिंद्रा उडोचे उत्पादन जहिराबाद येथील महिंद्राच्या अत्याधुनिक उत्पादन प्रकल्पात केले जात आहे. या प्रकल्पात कंपनीने मोठ्या प्रमाणात गुंतवणूक केली असून पूर्णपणे स्वयंचलित बॅटरी असेंब्ली आणि रोबोटायझ्ड उत्पादन लाईन्सची उभारणी करण्यात आली आहे.