अखेर प्रकल्पग्रस्तांनी जिंकली न्यायाची लढाई

नांदगाव पेठस्थित औद्योगिक वसाहतीसाठी संपादित शेत जमिनीचा वाढीव मोबदला मिळावा यासाठी प्रकल्पग्रस्त (१० नोव्हेंबर) ...

अमरावती : नांदगाव पेठस्थित औद्योगिक वसाहतीसाठी संपादित शेत जमिनीचा वाढीव मोबदला मिळावा यासाठी प्रकल्पग्रस्त (१० नोव्हेंबर) सोमवारपासून जिल्हाधिकारी कार्यालयासमोर उपोषणाला बसले होते. सलग चार दिवस चाललेल्या उपोषणात सात जणांची प्रकृतीही खालावली. अखेर जिल्हाधिकारी किरण गित्ते यांनी प्रकल्पग्रस्त आणि संबंधित अधिकाऱ्यांची संयुक्त बैठक जिल्हाधिकारी कार्यालयात पार पडली. या बैठकीत उपोषणकर्त्यांच्या मागण्यांवर विस्तृत चर्चा झाली. अखेर सर्व मागण्या तातडीने मंजूर केल्यानंतर उपोषणाची सांगता करण्यात आली.नांदगाव पेठ येथील औद्योगिक वसाहतीसाठी शासनाने या परिसरातील शेकडो शेतकऱ्यांच्या जमिनी संपादित केल्या होत्या. त्यावेळी अल्पसा मोबदला देऊन या जमिनी शासनाने ताब्यात घेतल्या. सध्याच्या बाजारभावानुसार या जमिनीचा वाढीव मोबदला मिळावा, यासाठी शेतकऱ्यांनी वारंवार आंदोलने केली. मात्र त्यांच्या पदरात काहीही पडले नाही. अल्पभूधारक शेतकऱ्यांची शेतजमीन प्रकल्पात गेल्यानंतर त्यांना उपजिविकेचे इतर कोणतेही साधन नसून दिलेल्या तोकड्या रक्कमेत सध्याच्या महागाईच्या काळात जमीन घेणे अशक्य होत आहे. त्यामुळे जमिनीचा वाढीव मोबदला मिळण्यासाठी कलम २८ (अ) अंतर्गत २९६ प्रकल्पग्रस्तांनी प्रकरणे दाखल केली होती. मात्र उपविभागीय अधिकारी कार्यालयाने २५० प्रकरणांचाच समावेश यादीत केला आहे.मात्र उर्वरित प्रकल्पग्रस्तांना वाऱ्यावर सोडून त्यांना न्याय न दिल्याने अन्यायाविरोधात दाद मागण्यासाठी या शेतकऱ्यांनी आंदोलन सुरू केले होते. सलग चार दिवस चाललेल्या उपोषणाची जिल्हाधिकाऱ्यांनी दखल घेऊन औद्योगिक वसाहतीसाठी संपादित शेतजमीणीचा सध्याच्या बाजारभावानुसार वाढीव मोबदला देण्यात येणार आहे. सोफिया पॉवर कंपनीत स्थानिक प्रकल्पग्रस्तांना रोजगारसुध्दा उपलब्ध जागेनुसार दिला जाईल. मोबदला देताना जे शेतकरी वंचित होते त्यांनाही समावून घेऊन येत्या मंगळवारपर्यंत मोबदला वाटपाचे काम सुरू करण्याचे आदेश जिल्हाधिकारी किरण गित्ते यांनी संबधीतांना दिले आहे. बैठकीला सोफीयाचे मुख्यकार्यकारी अधिकारी हिंमतराव देशभ्रतार, उपविभागीय अधिकारी प्रवीण ठाकरे, तहसीलदार सुरेश बगळे, भूसंपादन अधिकारी यांच्यासह आंदोलनकर्ते प्रवीण मनोहर,पांडुरंग धनसुईकर, वासुदेव लव्हाळे, सुखदेव मेश्राम आणि सत्यभामा मेश्राम, म. शकील म. नजीर, शे. इसमाईल शे. इसराईल, शे. दिवान शे. बुट्टू, रामकृष्ण पारवे, सुखदेवराव मेश्राम, पांडुरंग धनसुईकर, वासुदेव लव्हाळे, नारायण टाके, अ.बशीर शे. बट्टू, राजू पांडे, मारोतराव धंदेर, गणेश पांडे आदी उपस्थित होते.