अधिकारी अनुपस्थित, कर्मचाऱ्यांनी केला उपचार, उपविभागीय अधिकाऱ्यांकडे जवानाच्या कुटुंबाची लेखी तक्रार
धारणी : एका सैनिकाच्या कुटुंबाने जपलेला चार वर्षे वयाचा जर्मन शेफर्ड कुत्रा टायगरवर धारणीतील पशुवैद्यकीय रुग्णालयात पशुवैदयकीय अधिकाऱ्यांच्या अनुपस्थितीत तेथील काही कर्मचाऱ्यांनी उपचार केला. यादरम्यान त्याचा मृत्यू झाला. त्यांच्याकडून उपचारात हलगर्जीपणा झाल्याची लेखी तक्रार सैनिकपत्नी मालती कासदेकर यांनी उपविभागीय अधिकाऱ्यांकडे केली आहे.
धारणी शहरातील प्रभाग ३ मध्ये सैनिक बन्सीलाल कासदेकर यांचे कुटुंब राहते. बन्सीलाल हे पुलवामा येथे तैनात आहेत. या कुटुंबाने जानेवारी २०१६ मध्ये दोन महिने वयाच्या ‘टायगर’ला घरी आणले. गत आठवड्यात त्याची प्रकृती खालावल्याने धारणीतील पशुवैदयकीय रुग्णालयात दाखल केले. तेथील कर्मचाऱ्यांनी पशु वैदयकीय अधिकाऱ्याच्या अनुपस्थितीत उपचारादरम्यान टायगरला तीन इंजेक्शन दिले. ते कशासाठी, याची माहिती त्यांनी दिली नाही. कासदेकर कुटुंबाने टायगरच्या आरोग्यबाबत तयार केलेली डायरीदेखील तपासली नाही. उपचारानंतर घरी आणलेल्या टायगरचा काही तासांतच टायगर चा मृत्यू झाला. याबाबत पशुवैदयकीय अधिकाऱ्यांचा हलगर्जीपणा कारणीभूत असल्याची तक्रार उपविभागीय अधिकारी मिताली सेठी यांच्याकडे करण्यात आली आहे. मानवी रीतीरिवाजानुसार कासदेकर कुटुंबाने त्याच्यावर अंत्यविधी पार पडला.
------------धारणीतील पशुवैदयकीय रुग्णालयात अधिकाऱ्यांच्या अनुपस्थितीत कर्मचाऱ्यांनी उपचार केला. तो उपचार नेमका कशाचा, हेसुद्धा सांगितले नाही येथील अधिकारी नेहमीच गैरहजर असतात. त्यांच्यावर कारवाई व्हावी.
- मालती कासदेकर, सैनिकपत्नी, धारणी
--------
कोट