तिच्या नकारानंतर करायचा पाठलाग; 'तुझे लग्न दुसरीकडे कुठेही होऊ देणार नाही...' म्हणत एकतर्फी प्रेमातून तरुणीला दिली धमकी

Amravati : लग्नाचा प्रस्ताव फेटाळल्याच्या रागातून एका २२ वर्षीय तरुणीला धमकावून तिचा पाठलाग करणाऱ्या तरुणाविरुद्ध फ्रेजरपुरा पोलिस ठाण्यात गुन्हा दाखल करण्यात आला आहे.

लोकमत न्यूज नेटवर्क
अमरावती : लग्नाचा प्रस्ताव फेटाळल्याच्या रागातून एका २२ वर्षीय तरुणीला धमकावून तिचा पाठलाग करणाऱ्या तरुणाविरुद्ध फ्रेजरपुरा पोलिस ठाण्यात गुन्हा दाखल करण्यात आला आहे. सचिन जानराव इंगळे (वय २८, रा. शिराळा) असे गुन्हा दाखल झालेल्या संशयित आरोपीचे नाव असून, सध्या पोलिस त्याचा शोध घेत आहेत. २४ जानेवारी रोजी सायंकाळी यात एफआयआर नोंदविण्यात आला.

तक्रारदार एफआयआरनुसार, तरुणी आणि संशयित आरोपी सचिन यांची गेल्या दोन वर्षापासून ओळख होती. आरोपीने यापूर्वी पीडित तरुणीला लग्नासाठी विचारणा केली होती. मात्र, तरुणीने त्याला स्पष्टपणे नकार दिला होता. त्यानंतर तिने त्याच्याशी असलेला संपर्कही तोडला होता. याच कारणावरून सचिनने २३ जानेवारी रोजी संध्याकाळी तरुणीच्या येथील घरासमोर जाऊन तिला गाठले. 'तू माझा फोन का उचलत नाहीस? जर तू माझ्याशी लग्न केले नाहीस, तर तुला बघून घेईन आणि तुझे लग्न दुसरीकडे कुठेही होऊ देणार नाही,' अशा शब्दांत त्याने तरुणीला धमकावले.

सततचा पाठलाग आणि तक्रार

धमकी दिल्यानंतरही आरोपीचा त्रास थांबला नाही. तो सतत तरुणीच्या घराच्या परिसरात फेऱ्या मारत होता. अखेर आरोपीच्या जाचाला कंटाळून तरुणीने वडिलांसह फ्रेजरपुरा ठाणे गाठून घडलेला सर्व प्रकार सांगितला. तरुणीने दिलेल्या जबाबावरून पोलिसांनी रविवारी, २४ जानेवारी रोजी गुन्हा नोंदवला आहे. पोलिसांनी याप्रकरणी आरोपी सचिन इंगळे विरुद्ध पाठलाग, गुन्हेगारी स्वरूपाच्या धमकीचा गुन्हा दाखल केला. या प्रकरणाचा तपास पोलिस उपनिरीक्षक सारिका देशमुख करत आहेत.