लोकमत न्यूज नेटवर्कअमरावती : शेतात कापूस वेचताना दबा धरून बसलेल्या बिबट्याने महिलेवर अचानक हल्ला केला. यात दोन महिला, सुमन नागवंशी (३०), चंद्रकला मरसकोल्हे (५०), शेतकरी विवेक जयस्वाल व वनविभागाचे वाहनचालक चंद्रकांत मानकर जखमी झाले. ही घटना नांदगाव पेठ शिवारात संगमेश्वर रस्त्याजवळील जाधव यांच्या शेतात बुधवारी सकाळी १०.३० दरम्यान घडली. या परिसरातील ही पहिलीच घटना असल्याचे हे शेत लागवणीने करणारे रमाकांत जयस्वाल म्हणाले. नागपूर हायवेनजीनक संगमेश्वर रस्त्यावर दुचाकी शोरूमचे संचालक राजाभाऊ जाधव यांचे शेत आहे. नांदगाव पेठ येथील रमाकांत जयस्वाल यांनी ते सहा एकर शेत लागवणने केले आहे. बुधवारी सकाळी ९ वाजता कापूस वेचणीकरिता मजूर शेतात आले होते. सर्व महिला मजूर कापूस वेचत असल्याने अचानक पऱ्हाटीमध्ये दबा धरून बसलेल्या महिलेवर हल्ला केला. आरडाओरड झाल्याने तो पळाला. मात्र, भीती कायम राहिल्याने काहींनी गावातून आणून फटाके फोडले. वनविभागाला याची माहिती देण्यात आली. अवघ्या २० मिनिटात पोहरा चिरोडी बिटचे वनकर्मचारी ताफ्यासह दोन वाहन घेऊन घटनास्थळी दाखल झाले. तेवढ्यात बिबट पुन्हा दृष्टीस पडला. त्याला पकडण्याच्या प्रयत्नात शेतकरी एक वनकर्मचारी आणि शेतकरी विवेक रमाकांत जयस्वाल (३०) हे जखमी झाले. या प्रकाराने चवताळलेल्या बिबट्याला ट्रँक्यूलाईझ करण्यात आले. वनकर्मचाऱ्यांनी त्याला पिंजऱ्यात कैद केले नि वडाळी बिटमध्ये आणून ठेवले. वडाळीचे वनपरिक्षेत्र अधिकारी कैलास भुंबर, फिरत्या पथकाचे वनपरिक्षेत्र अधिकारी प्रशांत भुजाडे यांच्या मार्गदर्शनात कारवाई झाली.
अडीच वर्षांचा बिबट भरकटला?नांदगाव शिवारात आतापर्यंत बिबट आढळल्याचे ऐकिवात नाही. मात्र, अचानक ही घटना पहिल्यांदाच घडली. दोन ते अडीच वर्षांचा तो बिबट शिकार करण्याच्या नादात या परिसरात भरकटला असावा, असा कयास वनकर्मचाऱ्यांनी वर्तविला.
एकाचा इर्विनमध्ये उपचार सुरूनांदगाव पेठ येथील बिबट्याच्या हल्ल्यात दोन महिला व युवक जखमी झाले. मात्र, महिलांना किरकोळ जखम असल्याने प्राथमिक उपचाराअंती सुटी देण्यात आली. विवेक जयस्वाल यांच्या दोन्ही हाताला, छातीवर व पाठीवर जखमा आहेत.