धामणगावच्या योद्ध्याची विदेशात मानवसेवा

नागपूर येथे शासकीय वैद्यकीय महाविद्यालयात एमबीबीएस पदवी प्राप्त केल्यानंतर त्यांनी मुंबईच्या टाटा मेमोरियल हॉस्पिटल, लीलावती हॉस्पिटल तसेच पुण्याच्या लता मंगेशकर हॉस्पिटलमध्ये उच्चस्तर पदवी शिक्षण घेतले. लंडनच्या एका सिव्हिल हॉस्पिटलमध्ये डॉ. सफल साबळे दोन वर्षांपासून सेवा देत आहेत. ते तेथील रॉयल रेडी मोमेन्ट या अडीचशे बेडच्या सिव्हिल हॉस्पिटलचे हेड ऑफ इन्चार्ज आहेत.

ठळक मुद्देलंडनच्या इस्पितळात कार्यरत : कुटुंबाच्या सुरक्षिततेसाठी हॉटेलमध्ये मुक्काम

मोहन राऊ त।
लोकमत न्यूज नेटवर्क
धामणगाव रेल्वे : कोरोनाशी दिवसरात्र युद्ध लढत तब्बल शंभर रुग्णांना जीवदान देण्याचे कार्य धामणगावच्या सुपुत्राने विदेशात केले. त्याच वेळी आपल्या जन्मदात्याला व कुटुंबाला काही होऊ नये, म्हणून स्वत: हॉटेलमध्ये वेगळे राहण्याची दक्षता तो घेत आहे. डॉ. सफल साबळे असे या कोरोनायोद्ध्याचे नाव आहे. लंडनमध्ये ते वैद्यकीय सेवा बजावत आहेत.
धामणगाव शहरातील सर्वोदय कॉलनीतील हनुमान देवस्थानचे अध्यक्ष ज्ञानेश्वर साबळे यांचा मुलगा सफल साबळे हे लंडनच्या सिव्हिल हॉस्पिटलमध्ये आयसीयू स्पेशालिस्ट आहे. नागपूर येथे शासकीय वैद्यकीय महाविद्यालयात एमबीबीएस पदवी प्राप्त केल्यानंतर त्यांनी मुंबईच्या टाटा मेमोरियल हॉस्पिटल, लीलावती हॉस्पिटल तसेच पुण्याच्या लता मंगेशकर हॉस्पिटलमध्ये उच्चस्तर पदवी शिक्षण घेतले. लंडनच्या एका सिव्हिल हॉस्पिटलमध्ये डॉ. सफल साबळे दोन वर्षांपासून सेवा देत आहेत. ते तेथील रॉयल रेडी मोमेन्ट या अडीचशे बेडच्या सिव्हिल हॉस्पिटलचे हेड ऑफ इन्चार्ज आहेत. दररोज १७ ते ६५ वर्षे वयोगटातील कोरोना रुग्णांवर ते उपचार करतात. सध्या तेथे कोरोनामुळे दिवसेंदिवस मृत्यूची आकडेवारी वाढत आहे. एखाद्या रुग्णाचा लगेच मृत्यू होतो, तर कुणी उपचाराला प्रतिसाद देतात. आतापर्यंत शंभरच्या जवळ रुग्ण उपचाराने बरे झाले असल्याचे ते सांगतात.

लॉकडाऊन उत्तम पर्याय
केंद्र सरकारने लॉकडाऊन हा पर्याय निवडल्याने भारतात कोरोनाचा प्रसार अधिक प्रमाणात नाही. कोरोणावर लस उपलब्ध नाही. मात्र लॉकडाऊनमुळे संसर्गाची साखळी निश्चितच तुटते. मृत्यूचे तांडव रोज डोळ्याने पाहत आहे. त्यामुळे कुणीही कोरोनाला सहजतेने घेऊ नये. स्वत:ला व देशाला वाचण्यासाठी घरीच राहणे महत्त्वाचे असल्याची प्रतिक्रिया डॉ. सफल साबळे यांनी ‘लोकमत’ला दिली.