अमरावती : कोरोनामुळे आधी गणेशोत्सवापाठोपाठ शिवजयंती उत्सवही साधेपणाने, गर्दी न करता साजरा करण्यासाठी शासनाकडून प्राप्त मार्गदर्शक सूचना जिल्हाधिकारी शैलेश नवाल यांनी शुक्रवार, १२ फेब्रुवारी रोजी जारी केल्या असून, त्यानुसार यंदा शिवजयंतीच्या मिरवणुका काढण्यावर मनाई करण्यात आली आहे.
छत्रपती शिवाजी महाराज यांची जयंती अर्थात शिवजयंती हा उत्सव १९ फेब्रुवारी रोजी राज्यभर मोठ्या प्रमाणात साजरा केला जातो. कोविड १९ मुळे उद्भवलेल्या संसर्गजन्य परिस्थितीचा विचार करता, यंदा शिवाजी महाराज जयंती उत्सव साध्या पद्धतीने साजरा करण्याचा निर्णय घेण्यात आला आहे. त्याबाबत शासनाने मार्गदर्शक सूचना जारी केल्या असून, त्यांचे जिल्ह्यातील नागरिकांनी पालन करावे, असे आवाहन जिल्हाधिकारी शैलेश नवाल यांनी केले आहे. या वर्षी कोविड १९चा प्रादुर्भाव टाळण्यासाठी मोठ्या प्रमाणात एकत्र न येता, साधेपणाने शिवजयंती उत्सव साजरा करणे अपेक्षित आहे. दरवर्षी शिवजयंती साजरी करताना विविध कार्यक्रमांचे आयोजन केले जाते, परंतु या वर्षी कोणत्याही प्रकारे सार्वजनिक ठिकाणी पोवाडे, व्याख्यान, गाणे, नाटक इत्यादींचे सादरीकरण अथवा इतर सांस्कृतिक कार्यक्रमांचे आयोजन करण्यात येऊ नये. त्याऐवजी या कार्यक्रमाचे केबल नेटवर्क अथवा ऑनलाइन प्रक्षेपण उपलब्ध करून देण्याबाबत व्यवस्था करण्यात यावी, तसेच कोणत्याही प्रकारे प्रभात फेरी, बाइक रॅली, मिरवणुका काढण्यात येऊ नयेत. त्याऐवजी छत्रपती शिवाजी महाराजांच्या पुतळ्याला अथवा प्रतिमेला पुष्पहार अर्पण करण्याचा कार्यक्रम आयोजित करून, त्या ठिकाणी सोशल डिस्टन्सिंगचे पालन करून, मर्यादित व्यक्तींच्या उपस्थितीत शिवजयंती साजरी करण्याची परवानगी देण्यात आली आहे.
बॉक्स
आरोग्यविषयक कार्यक्रमास प्राधान्य द्या
शिवजयंतीच्या दिवशी आरोग्यविषयक उपक्रमापैकी रक्तदान शिबिरे आयोजित करण्यास प्राधान्य देण्यात यावे आणि त्याद्वारे कोरोना, मलेरिया, डेंग्यू इत्यादी आजार आणि त्यांचे प्रतिबंधात्मक उपाय, तसेच स्वच्छता याबाबत जनजागृती करण्यात यावी. सदर उपक्रम आयोजित करताना त्या ठिकाणी सोशल डिस्टन्सिंग, तसेच स्वच्छतेचे नियम (मास्क, सॅनिटायझर इत्यादी) पाळण्याकडे विशेष लक्ष देण्यात यावे, अशा सूचना शासनाने जारी केल्या आहे