वाशिम जिल्ह्याला वादळी पावसाचा तडाखा

जिल्हय़ातील मानोरा तालुका वगळता सर्वच तालुक्यांना वादळी पावसाने बुधवारी रात्री व आज (दि.८) रोजी सकाळी तडाखा दिला.

 वाशिम : जिल्हय़ातील मानोरा तालुका वगळता सर्वच तालुक्यांना वादळी पावसाने बुधवारी रात्री व आज (दि.८)  रोजी सकाळी तडाखा दिला. मंगरुळपीर तालुक्यात जिल्हय़ात सर्वाधिक पाऊस पडला. या वादळी पावसामुळे आंबा, भाजीपालावर्गीय पिके व उन्हाळी मूग, भुईमूग पिकांचे नुकसान झाले.
गत फेब्रुवारी-मार्चमध्ये वादळी पाऊस व गारपिटीमुळे जिल्हय़ात शेतकर्‍यांची रब्बी पिके भाजीपाला व फळपिकांचे प्रचंड नुकसान झाले होते. या संकटातून सावरत अनेक शेतकर्‍यांनी त्यांच्या ओलिताच्या शेतात उन्हाळी मूग व भुईमूग पिकांची लागवड केली; परंतु बुधवारी रात्री व आज  जिल्हय़ात मंगरुळपीर, कारंजा, वाशिम, मालेगाव व रिसोड तालुक्यात वादळी  पावसाने हजेरी लावली.
कारंजा तालुक्यात बुधवारी रात्री ७ ते ९ वाजताच्या दरम्यान व आज सकाळी ६ ते ८ वाजेपर्यंत पाऊस पडला. मंगरुळपीर तालुक्यात बुधवारी उत्तररात्री २.३0 वाजतापासून आज सकाळी ८.३0 वाजेपर्यंत पाऊस  सुरू होता. वाशिम व मालेगाव तालुक्यात आज सकाळी ६ ते ८.३0 वाजताच्या दरम्यान जोरदार पाऊस पडला. रिसोड तालुक्यात तुरळक स्वरूपाचा रिमझिम -रिमझिम असा पाऊस सकाळी ७.१५ ते ९.३0 वाजताच्या दरम्यान पडला.