अकोला: राहत्या घरामध्ये दोरीने गळफास लावून दोन युवकांनी आत्महत्या केल्याची घटना शुक्रवारी दुपारी मलकापुरातील अयोध्यानगर व सिंधी कॅम्प परिसरात घडली. या प्रकरणी खदान पोलिसांनी आकस्मिक मृत्यूची नोंद केली. निबंधे प्लॉटमध्ये राहणारे सचिन मधुकर नवरखेडे (३२) यांनी दिलेल्या तक्रारीनुसार, मलकापुरातील अयोध्यानगरात राहणारा कमलेश श्रीराम गीते (२७) याने त्याच्या राहत्या घरामध्ये शुक्रवारी दुपारी २ वाजताच्या सुमारास दोरीने गळफास लावून आत्महत्या केली. दुसरी घटना सिंधी कॅम्प परिसरात घडली. पोलिसांनी दिलेल्या माहितीनुसार, सिंधी कॅम्पमधील अमीन दिलीपकुमार केशवानी (२८) याने ७.३0 वाजतापूर्वी गळफास लावून आत्महत्येचा प्रयत्न केला; परंतु कुटुंबातील सदस्यांना ही बाब कळल्यानंतर त्यांनी तातडीने अमीनला खाली उतरविले आणि रुग्णालयात भरती केले; परंतु उपचारादरम्यान त्याचा मृत्यू झाला. दोन्ही युवकांनी केलेल्या आत्महत्येमागील कारण स्पष्ट होऊ शकलेले नाही. खदान पोलीस तपास करीत आहेत. या घटनांमागील कारणांचा शोधही पोलिस घेत आहेत.
गळफास लावून दोघांची आत्महत्या
By admin | Published: February 28, 2015 2:11 AM