Good News...मुलींच्या जन्मदरात अकोला राज्यात तिसऱ्या स्थानी!

Akola ranks third in birth rate of girls राज्यात मुलींच्या जन्मदरात सर्वाधिक वृद्धी हिंगोली जिल्ह्यात झाली.

ठळक मुद्देपहिल्या स्थानी हिंगोली, तर दुसऱ्या स्थानी सोलापूरअकोल्यात २०१८-१९ मध्ये एक हजार मुलांमागे ९२४ मुली जन्मल्या होत्या.

अकाेला : मुलांच्या तुलनेत कमी असलेला मुलींचा जन्मदर हा गत काही वर्षांपासून चिंतेचा विषय ठरत आहे. हा दर वाढविण्यासाठी ‘बेटी बचाव बेटी पढाव’ यासह विविध उपक्रम शासन स्तरावर राबविण्यात येत आहेत. याच उपक्रमातून देशभरात मुलींच्या जन्मदरात सुधारणा होत आहे. केंद्र शासनाच्या आरोग्य व्यवस्थापन माहिती प्रणालीच्या आकडेवारीनुसार, राज्यातही मुलींच्या जन्मदरात वृद्धी होत असून, यामध्ये अकोला राज्यात तिसऱ्या स्थानी असल्याची माहिती समोर आली आहे.

मुलींचा जन्मदर वाढविण्यासाठी शासनस्तरावर विविध उपक्रम राबविले जात आहेत. मुलींच्या जन्मदराविषयी आवश्यक सर्वच नोंदी दरवर्षी आरोग्य मंत्रालयामार्फत केल्या जातात. याच संदर्भात केंद्र शासनाच्या आरोग्य व्यवस्थापन माहिती प्रणालीच्या एका अहवालानुसार, २०१८-१९ च्या तुलनेत राज्यातील मुलींच्या जन्मदरात सुधारणा झाल्याचे दिसून आले. राष्ट्रीय पातळीवर विचार केल्यास २०१८-१९ च्या तुलनेत २०१९-२० या वर्षभरात फारशी सुधारणा झाल्याचे दिसून येत नाही, मात्र राज्यातील काही जिल्ह्यांमध्ये मुलींच्या जन्मदरात लक्षणीय वाढ झाल्याचे दिसून येत आहे. राज्यात मुलींच्या जन्मदरात सर्वाधिक वृद्धी हिंगोली जिल्ह्यात झाली. २०१८-१९ मध्ये जिल्ह्यात एक हजार मुलांमागे ९०१ मुलींचा जन्म झाला होता, २०१९-२० या वर्षभरात मुलींचा जन्मदर ४७ ने वाढून तो हजार मुलांमागे ९४८ असा झाला. राज्यात दुसऱ्या स्थानी सोलापूर जिल्हा असून, तिसऱ्या स्थानी अकोला जिल्ह्याचा क्रमांक लागतो. अकोल्यात २०१८-१९ मध्ये एक हजार मुलांमागे ९२४ मुली जन्मल्या होत्या.  

 

अशी आहे राज्याची स्थिती

जिल्हा - २०१८-१९ - २०१९-२० - मुलींच्या जन्मदरात झालेली वाढ

हिंगोली - ९०१ - ९४८ - ४७

सोलापूर - ८९३ - ९२८ - ३५

अकोला - ९२४ - ९५६ - ३२

उस्मानाबाद - ९०२ - ९२८ - २६

अमरावती - ९२६ - ९५२ - २६

धुळे - ९०३ - ९२८ - २५

यवतमाळ - ९५४ - ९७८ - २४

नाशिक - ९१४ - ९३४ - २०

ठाणे - ९६० - ९७९ - १९

लातूर - ९२२ - ९३८ - १६