श्रीगोंदा/देवदैठण : श्रीगोंदा तालुक्यातील ग्रामीण भागातील संशोधक विद्यार्थ्यांची टाकाऊ केळीच्या सालीपासून सेंद्रिय शू पॉलिश तयार करणाऱ्या प्रकल्पाची राष्ट्रीयस्तरावर उत्कृष्ट नवकल्पना म्हणून निवड झाली आहे.
तालुक्यातील कोंडेगव्हाण येथील निखिल संजय मगर व लोणी व्यंकनाथ येथील ऋषीकेश अशोक लबडे या ग्रामीण भागातील विद्यार्थ्यांनी केळीच्या सालीपासून सेंद्रिय शू-पॉलिश विकसित केली. हे दोघे शिरूर येथील चांदमल ताराचंद बोरा महाविद्यालयाचे विद्यार्थी असून सावित्रीबाई फुले पुणे विद्यापीठातर्फे हा प्रकल्प राष्ट्रीयस्तरावर सादर करण्यात आला होता. या प्रकल्पाची केंद्रीय मानव संसाधन विकास मंत्रालयातर्फे उत्कृष्ट नवकल्पना म्हणून निवड करण्यात आली आहे. विद्यापीठाचे कुलगुरू डॉ. नितीन करमाळकर आणि सेंटर फॉर इनोव्हेशन, इनक्युवेशन अँड लिंकेजेसच्या संचालिका डॉ. अपूर्वा पालकर यांच्या
प्रोत्साहनातून हा प्रकल्प गेल्यावर्षी राष्ट्रीय स्पर्धेत सादर करण्यात आला होता, असे महाविद्यालयाचे प्राचार्य डॉ. के.सी. मोहिते यांनी सांगितले. प्रा. नारायण घनगावकर यांच्या मार्गदर्शनाखाली विद्यार्थ्यांनी प्रकल्प तयार केला. महाविद्यालयाच्या नियामक मंडळाचे अध्यक्ष प्रकाश धारिवाल, शिरूर शिक्षण प्रसारक मंडळाचे अध्यक्ष अनिल बोरा आणि सचिव नंदकुमार
निकम यांनी संशोधनासाठी सुविधा उपलब्ध करून दिल्या.
---
विद्यार्थ्यांमध्ये संशोधनाच्या क्षमता असतात. फक्त त्यांना योग्य मार्गदर्शनाची आवश्यकता असते. ग्रामीण भागातील गरजा
ओळखून, त्याला पूरक संशोधन करणे गरजेचे आहे. त्यातूनच खऱ्या अर्थाने आत्मनिर्भर भारताचे स्वप्न
पूर्ण होईल.
- डॉ. के.सी. मोहिते,
प्राचार्य, चांदमल ताराचंद बोरा महाविद्यालय, शिरूर
----
चौकट :
आमच्या प्रकल्पाचे रोपटे श्रीगोंद्यातील श्री छत्रपती शिवाजी महाविद्यालयातील डॉ. योगेश अहिरे यांच्या मार्गदर्शनात रुजले. त्याला वटवृक्षात रूपांतर करायचे काम चांदमल ताराचंद बोरा महाविद्यालातील डॉ. नारायण घनगावकर यांनी मार्गदर्शन करताना परिस्थिती गरीब असल्यामुळे प्रकल्पाला लागणारी आर्थिक मदतही केली. प्राचार्य डॉ. के.सी. मोहिते यांनी सर्व सोयी उपलब्ध करून दिल्या. आर्थिक पाठबळ मिळाले तर स्वतःचा उद्योग उभा करू शकतो.
-निखिल मगर, ऋषीकेश लबडे
संशोधक विद्यार्थी
----
फोटो
०९निखिल मगर, ०९ऋषिकेश लबडे