रस्त्याचे काम बंद का? रस्ता अडविणाऱ्याचाच पालिकेला सवाल

श्रीगोंदा : शहरातील नगरपालिकेच्या मांडवगण रस्त्याचे काम मोहन भिंताडे यांनी अडविले आहे. त्यांनीच पालिकेला पत्र देऊन गट क्रमांक ९३० ते ११०६ दरम्यानचे काम बंद का? असा खुलासा मागितला आहे. यानंतर पालिकेने सुरू केलेले काम भिंताडे यांनी पुन्हा अडविले आहे. त्यामुळे अधिकारी, पदाधिकारीही आक्रमक झाले आहेत.

मोहन भिंताडे हे राष्ट्रवादी महिला काँग्रेसच्या तालुकाध्यक्ष मीनल भिंताडे यांचे पती आहेत.

संभाजी ब्रिगेडचे जिल्हाध्यक्ष टिळक भोस यांनी शहरातील रस्त्यांची परिस्थिती आणि काम आडविणाऱ्यांचा आडमुठेपणा, हतबल नगरपालिका याकडे नुकतेच लक्ष वेधले हाेते. त्यावर पालिकेचे मुख्याधिकारी मंगेश देवरे यांनी मोहन भिंताडे यांनी श्रीगोंदा-मांडवगण रस्त्याचे काम अडवून सरकारी कामात अडथळा आणला म्हणून श्रीगोंदा पोलीस ठाण्यात लेखी तक्रार केली.

शहरातील ३३ कोटी खर्च करून १७ रस्त्यांची कामे पूर्ण करण्याचा प्रयत्न नगरपालिकेकडून सुरू आहे; मात्र मांडवगण रस्त्यावर मोहन भिंताडे यांनी काम बंद पाडले. याबाबत न्यायालयाचा काम बंद ठेवण्याबाबत कोणताही मनाई हुकूम नाही, तरीही नगरपालिकेने सबुरीची भूमिका घेतली.

त्यातच मोहन भिंताडे यांनी पालिकेला लेखी पत्र देऊन मांडवगण रस्त्याचे काम बंद आहे. यावर त्यांनी लेखी खुलासा मागविला. त्यामुळे नगरपालिकेतील सत्ताधारी व विरोधी गटाच्या नगरसेवकांनी या मुद्द्यावर एकत्र घेऊन पालिकेला वेठीस धरणाऱ्या व्यक्तीला धडा शिकविण्यासाठी आक्रमक भूमिका घेण्याचा निर्णय घेतला आहे.

---

पोलीस बंदोबस्तात काम सुरू करणार

नगरपालिकेने कामे करताना कुणावर अन्याय होऊ नये, ही भूमिका घेतली आहे. आता संयम संपला आहे. मांडवगण रस्त्याचे काम पोलीस बंदोबस्तात दोन दिवसात सुरू करणार आहे. आता आम्ही कामावर स्वत: थांबणार आहोत, अशी माहिती नगराध्यक्ष शुभांगी पोटे यांनी दिली.

--

न्यायालयाचा कोणताही मनाई हुकूम नसताना मांडवगण रस्त्याचे काम आडविले आहे. त्यांनी शहरातील नागरिकांना वेठीस धरले आहे. पालिकेने पोलीस बंदोबस्तात काम करण्याचा उशिरा का होईना घेतलेला निर्णय चांगला आहे.

-सतीश बोरूडे,

सामाजिक कार्यकर्ते

-----

२२ मांडवगण रस्ता

श्रीगोंदा शहरातील मांडवगण रस्त्याचे रखडलेले काम.