अहमदनगर : लॉकडाऊन सुरू असताना सर्व नियम धाब्यावर बसवत एका निवासस्थानी व चक्क दालनातसुद्धा वाढदिवसाची पार्टी साजरी केल्याने अडचणीत आलेले महापालिकेचे वैद्यकीय आरोग्य अधिकारी डॉ. अनिल बोरगे यांना मनपा आयुक्तांनी अखेर सक्तीच्या रजेवर पाठविले आहे. कोविड रुग्णालयांना परवानगी देताना नियमांचे पालन केले नाही यासह १७ प्रकारचे गंभीर ठपके त्यांच्यावर ठेवण्यात आले आहेत.
कोविड-१९चा प्रादुर्भाव रोखण्याची जबाबदारी असताना डाॅ. बोरगे हे अनेक बाबीत अपयशी ठरले, असे आयुक्त शंकर गोरे यांनी आदेशात स्पष्टपणे म्हटले आहे. कर्मचाऱ्यांची गर्दी जमवून आपल्या दालनात व निवासस्थानी बोरगे गाणे गात असल्याचा व्हिडीओ व्हायरल झाला होता. याप्रकरणी समाजातून संताप व्यक्त झाला. बोरगे यांना प्रशासनाने नोटीस बजावली होती. परंतु, त्यांनी मुदतीत खुलासा केला नाही. जिल्ह्याचे पालकमंत्री हसन मुश्रीफ यांच्याकडेही बोरगे यांच्याबाबत अनेक तक्रारी दाखल होत्या. त्यांनी बोरगे यांच्यावर कारवाई करण्याचा आदेश मनपा आयुक्तांना दिला असल्याचे समजते. आयुक्तांनी मनपाच्या सामान्य प्रशासन विभागाकडून अहवाल मागविला होता. त्यानंतर ही कारवाई करण्यात आली. बोरगे हे यापूर्वीही अनेक प्रकरणात वादग्रस्त ठरलेले आहेत. ते निलंबितही झाले होते. मध्यंतरी एका महिला कर्मचाऱ्याच्या मुलाने केलेल्या तक्रारीमुळेही ते वादग्रस्त ठरले. त्यांच्या दालनात रेमडेसिविर इंजेक्शन सापडल्याप्रकरणीही पोलिसांकडून स्वतंत्र चौकशी सुरू आहे.
.....
बोरगे यांच्या कामकाजाबाबत आयुक्तांनी दाखविलेल्या त्रुटी
- शासनाच्या मार्गदर्शक सूचनेनुसार लशींचे वाटप न करता कर्मचाऱ्यांकडून परस्पर वाटप करणे
- बाधितांच्या संपर्कातील व्यक्तींची तपासणी करण्यावर नियंत्रण न ठेवणे
- शासनाच्या निर्देशानुसार मृत पावलेल्या रुग्णांचे ऑडिट केले नाही
- शासनाच्या पोर्टलवर मुदतीत माहिती न भरणे
- दालनात सोशल डिस्टन्सिंग न ठेवता गाणे म्हणून महापालिकेची प्रतिमा मलीन करणे
- स्वत:चे मालमत्ता प्रमाणपत्र २०१३- १४ पासून सादर केलेले नाही
- कोविडबाबतचे दैनंदिन अहवाल वेळेत सादर न करणे
- कोरोनात प्रतिबंधक क्षेत्र तयार करण्याबाबत वेळेत माहिती सादर न करणे
- शहरातील रुग्णालयांनी वापरलेल्या रेमडेसिविर इंजेक्शनच्या मोकळ्या व्हायल ताब्यात घेऊन त्यांची दैनंदिन माहिती सादर केली नाही
- कोविड रुग्णालयांना परवानगी देताना शासकीय निकषांचे पालन केले नाही
- माझे कुटुंब माझी जबाबदारी मोहिमेचा अहवाल सादर न करणे
...............
जिल्हा शल्य चिकित्सकांबाबतही आक्षेप
नगरचे जिल्हाधिकारी राजेंद्र भोसले यांनी येथील जिल्हा शल्य चिकित्सक डॉ. सुनील पोखरणा यांच्यावरही कारवाई करण्याचा प्रस्ताव आरोग्य विभागाला पाठविला आहे. त्यांनी पंतप्रधानांच्या व्हिडीओ काॅन्फरन्स बैठकीलाच अनुपस्थिती दर्शवली. जिल्हाधिकाऱ्यांनी प्रस्ताव पाठविल्यानंतरही डॉ. पोखरणा पदावर कायम आहेत. महापालिकेतही वैद्यकीय अधिकारी सक्षम नसल्याचे बोरगे यांच्यावरील कारवाईमुळे समोर आले.