चंद्रकांत शेळके
लोकमत न्यूज नेटवर्क
अहमदनगर : लॉकडाऊनच्या काळात बँका, एटीएम बंद असताना तसेच बाहेर पडण्यास बंधने असताना पोस्ट बँकेकडून ग्राहकांना आर्थिक हातभार देण्यात आला. या काळात नगर जिल्ह्यात पोस्ट बँकेने २५ हजार ग्राहकांना तब्बल सव्वासहा कोटींचे घरपोच वाटप केले.
सर्वसामान्य ग्राहकांचे व्यवहार बहुदा पोस्ट विभागाशी जोडलेले आहेत. विश्वासार्ह सेवा, पारदर्शकता आणि घरपोच सेवेमुळे ग्राहक पोस्ट विभागात गुंतवणूक करण्यास प्राधान्य देतात. पोस्ट विभागाचे देशभरात इंडिया पोस्ट पेमेंट बँक आणि सेविंग बँक अशा दोन भागांत आर्थिक व्यवहार चालतात.
कोरोनाकाळात लॉकडाऊनमध्ये सर्वसामान्य माणसांना घराबाहेर पडण्यास बंधने होती, अशा अडचणीच्या काळात अहमदनगर विभागात २५ हजार ग्राहकांना पोस्टमनदादांनी घरपोच जाऊन पैसे दिले. यामध्ये वयोवृद्ध, पेन्शनधारक तसेच इतर कामगारवर्गाचा समावेश होता. ही रक्कम ६ कोटी २५ लाख १६ हजार ४३४ एवढी आहे. यासाठी ग्रामीण भागात ३०९ तर शहरात ६७ अशा एकूण ३७६ पोस्टमनने ही सेवा बजावली.
-----------------
लॉकडाऊनमध्ये पोस्ट बँकेकडून घरपोहोच वाटप - ६ कोटी २५ लाख
ग्राहकांना लाभ - २५६३८
एवढ्या पोस्टमनने बजावली सेवा - ३७६
------------------
औषधींसह जीवनावश्यक वस्तूंचे वाटप
कोरोनाकाळात पोस्ट विभागाकडून अत्यावश्यक सेवा वस्तू तसेच औषधीचे वाटप करण्यात आले. याशिवाय इतर पार्सल, मनीऑर्डर तसेच पोस्टव्यतिरिक्त इतर बँकेत खाते असलेल्या लोकांनाही आधारकार्डच्या आधारे थम्ब घेऊन पैसे दिले गेले.
-------------
३३५१ विद्यार्थ्यांचे स्कॉलरशिप खाते
लॉकडाऊन काळात जिल्ह्यातील ३३५१ विद्यार्थ्यांनी स्कॉलरशिपसाठी पोस्ट बँकेत खाते उघडले.
--------------
पोस्टाच्या विश्वासार्ह सेवेमुळे सामान्य लोकांचा पोस्टावर विश्वास आहेच. परंतु, लॉकडाऊनमध्ये पोस्ट विभागाने विशेष सेवा दिल्याने हा विश्वास आणखीनच वाढला आहे.
- जे. टी. भोसले, वरिष्ठ डाक अधीक्षक, नगर विभाग