केडगाव : दुपारची एक वाजताची वेळ.. रणरणते ऊन.. चिखल पाण्याचा निसरडा रस्ता.. चिखलातच रुतलेले पाय.. यासह अधिकाऱ्यांची झालेली दमछाक.. आणि इच्छित स्थळी पोहोचल्यावर सर्वांनी सोडलेला सुस्कारा.. प्रसंग होता शिवार भेटीचा आणि ब्रिटिशकालीन झालेल्या साठवण बंधाऱ्याची पाहणी करण्याचा. नगर तालुक्यातील कामरगाव येथे जि. प.चे अतिरिक्त मुख्य कार्यकारी अधिकारी जगन्नाथ भोर यांनी ग्रा. पं. कार्यालयास भेट दिली. त्यांनी गावात चालू असलेल्या विविध विकासकामांचा आढावा घेऊन मार्गदर्शक सूचना दिल्या.
त्यानंतर शिवार भेटीचे नियोजन झाले. गावकुसापासून कामरगाव -पिंपळगाव कौडा सीमेवर १ किमी अंतरावर वालुंबा नदीवर ब्रिटिशकालीन दगडी साठवण बंधारा आहे. तेथे जाण्यासाठी चांगला रस्ता नाही. पावसामुळे झालेला चिखल-पाणी व नदीकाठी वाढलेले उंच गवत यातून पायपीट करून १ किमी अंतर पार करीत भोर यांनी तत्कालीन बंधाऱ्याची पाहणी केली. यावेळी त्यांच्या समवेत आलेल्या अधिकाऱ्यांसह ग्रामस्थांचीदेखील दमछाक झाली. बंधाऱ्याचे बांधकाम दर्जेदार असल्याचे पाहून ते अचंबित झाले. लागलीच त्यांनी बंधाऱ्याच्या खोलीकरणासह मजबुतीकरणाचे अंदाजपत्रक तयार करण्याच्या सूचना अधिकाऱ्यांना दिल्या. हे काम पूर्ण झाल्यास परिसरातील विहिरी, विंधन विहिरींच्या पाण्याची पातळी उंचावून ५० हेक्टर जमीन बारामाही ओलिताखाली येईल, असा आशावाद ग्रामस्थांनी व्यक्त केला.
शिवार फेरीच्या वेळी सरपंच तुकाराम कातोरे, माजी सैनिक संघटनेचे अध्यक्ष प्रकाश ठोकळ, ग्रा. पं. सदस्य संदीप ढवळे, अॅड. प्रशांत साठे, ग्रा. पं. लिपिक लक्ष्मण ठोकळ, योगेश ठोकळ, ग्रामसेवक सुरेश मगर, अभियंता एम. डी. झावरे, रवींद्र माळी, मच्छिंद्र जाधव, गणेश खाडे, संतोष साठे, विजय भुजबळ, उल्हास दळवी यांच्यासह ग्रामस्थ उपस्थित होते. जिल्ह्यातील कामाचा प्रचंड ताण असताना भोर यांनी वेळ देऊन ग्रामस्थांच्या अडचणी समजून घेतल्या व कार्यवाही करण्याचे आश्वासन दिले, त्यामुळे शेतकऱ्यांनी समाधान व्यक्त केले.
----
शासनाच्या लोकाभिमुख योजना तळागाळापर्यंत पोहोचविण्यासाठी भोर यांचा शिवार भेटीचा उपक्रम स्तुत्य व प्रेरणादायी आहे.
- तुकाराम कातोरे,
सरपंच, कामरगाव
190721\img-20210718-wa0462.jpg
कामरगाव शिवार भेट फोटो