गुन्हा दाखल : आर्थिक गुन्हे शाखेकडे तपास वर्ग
श्रीरामपूर : येथील परळी पीपल्स अर्बन मल्टीस्टेट सोसायटीच्या शाखेत ११ कोटी ४२ लाख रुपयांचा अपहार करण्यात आल्याच्या तक्रारीवरून शहर पोलीस ठाण्यात गुन्हा दाखल करण्यात आला आहे. जिल्हा पोलीसप्रमुखांनी या प्रकरणाचा तपास आर्थिक गुन्हे शाखेकडे वर्ग केला आहे. या प्रकरणी संजय शिंदे यांनी पोलीस ठाण्यात फिर्याद दिली आहे.
आरोपींमध्ये तत्कालीन उपाध्यक्ष नितीन घुगे, मुख्य व्यवस्थापक विश्वजित ठोंबरे, मुख्य कार्यकारी अधिकारी निखिलेश मानुरकर व संचालिका निमिषा खेडकर, प्रमोद किसन खेडकर यांचा समावेश आहे. या सर्वांनी शाखाधिकारी व रोखपाल यांच्याशी संगनमत करून अपहार केल्याचे लेखापरीक्षण अहवालावरून निष्पन्न झाल्याचे फिर्यादीत म्हटले आहे. गुन्हा मोठ्या अपहाराचा तसेच गुंतागुंतीचा व अतिशय गंभीर स्वरूपाचा असल्याने तो आर्थिक गुन्हे शाखेकडे वर्ग करण्यात आला आहे.
या सोसायटीच्या जिल्ह्यात श्रीरामपूरसह नेवासा, तिसगाव, शेवगाव, देवळाली प्रवरा, पाथर्डी येथे शाखा होत्या. या शाखांमध्ये ठेवीदारांनी मोठ्या प्रमाणात गुंतवणूक केली. मात्र, मुदत पूर्ण होऊनही जर पैसे परत मिळालेले नसतील, तर त्यांच्या मूळ ठेव पावत्या व त्याच्या छायांकित प्रती गुन्ह्याच्या तपासासाठी आवश्यक आहेत. त्यामुळे अशा ठेवीदारांनी या कागदपत्रांसह आर्थिक गुन्हे शाखेसमोर हजर होण्याचे आवाहन करण्यात आले आहे.
----------