अहमदनगर : शहरातील लहान-मोठ्या २२ कोविड रुग्णालयांनी कोरोना रुग्णांच्या बिलात अतिरिक्त ९ लाख ३६ हजार रुपये आकारले होते. महापालिकेने केलेल्या लेखा परीक्षणात ही बाब समोर आली आहे.
कोविड रुग्णालयातून डिस्चार्ज देण्याआधी रुग्णांना दिलेले बिल तपासले जाते. त्यासाठी महापालिकेने ४८ लेखा परीक्षकांची नेमणूक केली आहे. हे लेखा परीक्षक रुग्णालयात जाऊन बिलांची तपासणी करतात. २० एप्रिल ते ३१ मे या काळात लेखा परीक्षकांकडून ५ हजार २४९ रुग्णांच्या बिलांची तपासणी झाली. यामध्ये ९ लाख ३६ हजार ७०० रुपये अतिरिक्त आकारण्यात आल्याचे निदर्शनास आले. ही रक्कम कमी करून रुग्णांना बिल दिले गेले. त्यामुळे रुग्णांना आधार मिळाला. अतिरिक्त बिले आकारणाऱ्या रुग्णालयांच्या यादीत शहरातील बड्या रुग्णालयांचाही समावेश आहे. रुग्णांना पक्के छापील बिल न देता कच्चे बिल देऊन पैसे उकळण्याचेही प्रकार सुरू होते. हे प्रकार पूर्व लेखा परीक्षणामुळे थांबले असल्याचे प्रशासनाकडून सांगण्यात आले.
कोरोनाच्या पहिल्या लाटेत झालेल्या तपासणीत जिल्ह्यात रुग्णालयांच्या बिलात एक कोटी २० लाख रुपयांची तफावत आढळली होती. ही रक्कम रुग्णांना परत करण्यासाठी प्रशासनाने रुग्णालयांना नोटिसा बजावल्या. मात्र, त्याविरोधात रुग्णालयांनी न्यायालयात धाव घेतली. दुसऱ्या लाटेत सरकारने सावध भूमिका घेत रुग्णांना डिस्चार्ज देण्याआधीच बिलांची तपासणी करण्याचा आदेश दिला आहे.
.....
७० रुग्णांवर महात्मा फुले जनआरोग्य योजनेतून उपचार
शहरातील कोविड केअर सेंटरमधील पाच हजार बिलांची लेखा परीक्षकांकडून तपासणी करण्यात आली आहे. यापैकी केवळ ७० रुग्णांवर महात्मा फुले जनआरोग्य योजनेतून उपचार झाले असल्याचे लेखा परीक्षणातून समोर आले आहे.
.....
सुरभी हॉस्पिटलला नोटीस
औरंगाबाद महामार्गावरील सुरभी रुग्णालय सोयीनुसार ऑक्सिजन, नोंदणी फी, साफसफाई, आयसीयूचे अतिरिक्त बिल आकारत आहे. यासंदर्भात लेखा परीक्षकांकडून शासकीय दराने बिल आकारण्याबाबत रुग्णालयास कळविण्यात आले. परंतु, त्याकडे दुर्लक्ष केले जात असून, रुग्णांना डिस्चार्ज देण्याआधी बिल तपासणीसाठी उपलब्ध करून द्यावे, अन्यथा कारवाई केली जाईल, अशी नोटीस मनपा आयुक्त शंकर गोरे यांनी या हॉस्पिटलला बजावली आहे.
..............
मुंबई, पुण्याच्या तोडीचे दर
नगर शहरातील व जिल्ह्यातील काही रुग्णालयांत दर्जेदार सुविधा उपलब्ध नाहीत. मात्र, शासनाने परवानगी दिल्याने या रुग्णालयांनीही मुंबई, पुण्यातील दराप्रमाणे रुग्णांना दर आकारले आहेत.