Pune: माॅडेलिंगसाठी मैत्रिणीला नेले, रागातून कोयत्याने वार; चौघांविरुद्ध गुन्हा दाखल

याप्रकरणी सराईतासह चौघांविरुद्ध गुन्हा नाेंदवला आहे....

पुणे : मैत्रिणीला माॅडेलिंगसाठी नेल्याच्या रागातून सराइताने एका तरुणावर कोयत्याने वार केला. ही घटना टिळक रस्ता परिसरात घडली. याप्रकरणी सराईतासह चौघांविरुद्ध गुन्हा नाेंदवला आहे.

याप्रकरणी ओम गायकवाडसह त्याच्या तीन साथीदारांविरुद्ध गुन्हा दाखल केला आहे. वेदांत राजकुमार शिंदे (वय १९, रा. लोहियानगर, गंज पेठ) असे जखमी तरुणाचे नाव आहे. गायकवाड सराईत गुन्हेगार आहे. त्याच्या मैत्रिणीला वेदांतने माॅडेलिंगसाठी नेले होते. तिला गैरकृत्यासाठी नेत असल्याच्या गैरसमजातून गायकवाड वेदांतवर चिडला होता.

मंगळवारी सायंकाळी आरोपी गायकवाड आणि त्याच्या साथीदारांनी वेदांतला टिळक रस्त्यावरील स. प. महाविद्यालय परिसरात गाठले. त्याच्यावर कोयत्याने वार केले. त्याला जिवे मारण्याची धमकी देऊन चौघे जण पसार झाले. या घटनेची माहिती मिळताच वरिष्ठ पोलिस निरीक्षक दीपाली भुजबळ यांनी घटनास्थळी धाव घेतली. पसार झालेल्या आरोपींचा शोध घेण्यात येत असून, सहायक पोलिस निरीक्षक पांडुरंग वाघमारे तपास करत आहेत.