स्मार्ट सिटीच्या कामांमध्ये नागरिकांचा सहभाग महत्त्वाचा : डॉ. राजेंद्र जगताप 

पुणे स्मार्ट सिटी मिशन अंतर्गत बीजगोळे (सीडबॉल) निर्मिती उपक्रम राबवण्यात आला. 

ठळक मुद्देचिंच, बहावा, आपटा, कांचन, खैर, तामण, बाभूळ, आवळा, पारिजातक, बकुळ अशा स्थानिक झाडांच्याच बिया नुसत्या बिया टाकल्यास त्याला कीड, बुरशी

पुणे : बीजगोळे निर्मिती करून पर्यावरणाला हातभार लावतानाच हा उपक्रम राबविताना नागरिकांच्या दारी स्मार्ट सिटीचे काम पोचवून आणि त्यांच्या समस्या, सूचना जाणून उपाययोजना करण्यासाठी त्या विचारात घेतल्या जातील. अशा प्रकारे आम्ही स्मार्ट सिटीच्या विकासकामांमध्ये नागरिकांना सहभागी करून घेत आहोत, असे मत पुणे स्मार्ट सिटी मिशनचे मुख्य कार्यकारी अधिकारी डॉ. राजेंद्र जगताप यांनी व्यक्त केले.
पुणे स्मार्ट सिटी मिशन अंतर्गत सोसायटी फॉर सायन्स एन्व्हायर्न्मेंट अँड पीपल (सेप) आणि भवताल मॅगझीन यांच्या वतीने बाणेर, औंध, बालेवाडी परिसरातील अनेक सोसायट्यांमध्ये बीजगोळे (सीडबॉल) निर्मिती उपक्रम राबवण्यात आला. 
या उपक्रमात लहान मुलांपासून ज्येष्ठ नागरिकांपर्यंत सर्व सहभागी झाले होते. बालेवाडी येथील कम्फर्ट झोन सोसायटीमध्ये या उपक्रमाचे उद्घाटन करण्यात आले. 
या उपक्रमाच्या माध्यमातून पुणे स्मार्ट सिटी मिशनमध्ये थेट नागरिकांचा सहभाग वाढवता येणार आहे. तसेच तयार झालेले बीजगोळे त्या-त्या भागात झाडे लावण्यासाठी उपयोगात आणले जाणार आहेत. पुणे स्मार्ट सिटी मिशन अंतर्गत बाणेर, औंध, बालेवाडी या भागात विविध योजना राबवण्यात येत आहे. त्यात आता या हरित उपक्रमाची भर पडणार आहे, असेही डॉ. जगताप यांनी सांगितले. 
यावेळी कम्फर्ट झोन सोसायटीच्या परिसरातील नागरिक मोठ्या संख्येने उपस्थित होते. आबालवृद्धांनी या उपक्रमात सहभागी होत बीजगोळे तयार केले. सीईओ डॉ. राजेंद्र जगताप यांनी नागरिकांशी थेट संवाद साधून त्यांच्या प्रश्नांना उत्तरे दिली. येथील स्थानिक विकास प्रकल्पांबाबत नागरिकांना त्यांनी माहिती दिली. स्मार्ट सिटीच्या वतीने नजीकच्या काळात होणाऱ्या विकासकामांबद्दल नागरिकांनी समाधान व्यक्त केले. 
यावेळी नगरसेविका स्वप्नांली सायकर, नगरसेवक अमोल बालवडकर, नगरसेविका ज्योती कळमकर, अनिल गायकवाड आदी उपस्थित होते. 
......................
निसर्ग संवर्धनाचा संस्कार 
बीजगोळे करताना मातीत, शेणात हात घालावा लागतो. बी हाताळावी लागते. त्यामुळे निसर्गाशी, पर्यावरणाशी जवळीक निर्माण होते. झाडाशी एक प्रकारचे नाते निर्माण होते. यातून सर्वांवरच संस्कार संवर्धनाचा घडतो. विशेषत: मुलांमध्ये याचा अधिक फायदा पाहायला मिळतो. त्याशिवाय गटामध्ये हा उपक्रम राबवला तर सांघिक भावना जोपासली जाते. 
..........................
बीजगोळे म्हणजे काय? 
बीजगोळे म्हणजे सुकलेले शेण व माती यांचा चिखल करून त्यामध्ये बी टाकायचे. त्याचा गोळा करून तो सुकवायचा आणि पावसाळ्यात तो निसर्गात टाकायचा. बीजगोळे तयार करण्यासाठी चिंच, बहावा, आपटा, कांचन, खैर, तामण, बाभूळ, आवळा, पारिजातक, बकुळ अशा स्थानिक झाडांच्याच बिया वापरल्या जातात. 
...................
बीजगोळ्याचे फायदे 
नुसत्या बिया टाकल्यास त्याला कीड, बुरशी लागू शकते. तसेच त्या पावसाच्या पाण्यासोबत वाहून जाण्याची शक्यता असते. याशिवाय किडे, मुंग्या बिया खाऊ शकतात. त्यामुळे बिया रुजण्याची शक्यता कमी होते. बीजगोळ्यांमुळे बी रुजण्याची प्रमाण वाढते. कारण, मातीमुळे बी संरक्षित होते. तसेच शेणामुळे पोषक घटकही मिळतात. बीजगोळे तयार करण्यासाठी विशेष वेगळी साधने लागत नाहीत. ही पद्धत अगदीच सोपी आणि आनंद देणारीसुद्धा आहे.