अमानुषपणा... पत्नीला फासावर लटकवलं आणि तिच्या कुटुंबाला मेसेज करून कळवलं!

राहुल याला दारूचे व्यसन होते़ त्यावर मोबाईल चोरीचे गुन्हे दाखल आहेत. दारू सोडण्यासाठी कोमलच्या नातेवाईकांनी त्याला पनवेल येथील व्यसनमुक्ती केंद्रात ठेवले होते....

पुणे : पतीने पत्नीला मारहाण करुन छताच्या पंख्याला फाशी देऊन तिचा खुन करण्याची घटना नऱ्हे  येथील मानाजीनगरमध्ये गुरुवारी सकाळी उघडकीस आली़ पतीने पत्नीच्या नातेवाईकांना मेसेज करुन ही माहिती दिल्यानंतर हा प्रकार उघडकीस आला़.   कोमल राहुल हंडाळ (वय २२) असे खुन झालेल्या महिलेचे नाव आहे़ सिंहगड रोड पोलीस तिचा पती राहुल राजेश हंडाळ (वय २३, रा़ अंकुश पॅलेस, कुटे मळा, मानाजीनगर, नऱ्हे) याचा शोध घेत आहेत़.

याबाबत पोलिसांनी दिलेल्या माहितीनुसार, कोमल ही एका खासगी रुग्णालयात साफसफाईचे काम करीत होती़ तिचे वडिल, भाऊ कर्वेनगरला राहतात़ राहुल हा पूर्वी वारजे येथे रहात असे़ त्याच्या वडिलांचे निधन झाल्यानंतर त्याची आई मार्केटयार्ड येथे रहायला गेली़ कोमल आणि राहुल यांचा प्रेमविवाह होता. राहुल याला दारूचे व्यसन होते़ त्यावर मोबाईल चोरीचे गुन्हे दाखल आहेत़ दारू सोडण्यासाठी कोमलच्या नातेवाईकांनी त्याला पनवेल येथील व्यसनमुक्ती केंद्रात ठेवले होते़ तेथून तो काही दिवसांपूर्वीच परत आला होता़. 

 त्या दोघांमध्ये भांडण झाल्याने कोमल काही दिवसांपूर्वी माहेरी कर्वेनगरला गेली होती़ दोन दिवसांपूर्वी राहुलने आता आपली भांडणे होणार नाहीत, असे सांगून तिला माहेरहून घरी परत आणले होते़ गुरुवारी पहाटे यांच्यात पुन्हा भांडणे झाली़ त्यानंतर त्याने कोमलला मारहाण करुन तिला सिलिंगच्या पंख्याला अटकवून फाशी देऊन तिचा खुन केला़ त्यानंतर सकाळी सहा च्या सुमारास तो घरातून बाहेर पडला़ त्याने तिच्या नातेवाईकांना मेसेज केला़ तिने मला धोका दिला असा सांगून मी तिला फाशी देऊन खुन केला आहे़ असे मेसेजमध्ये त्याने म्हटले होते़.

कोमलच्या नातेवाईकांनी सिंहगड रोड पोलीस ठाण्यात जाऊन याची माहिती दिली़ त्यानंतर ते पोलिसांबरोबर सकाळी पावणे बारा वाजता त्यांच्या घरी गेले़ कुलूप उघडून आत प्रवेश केल्यावर कोमलला खाली झोपविलेले दिसून येत होते़ तिच्या अंगावर ड्रेस होता़ त्यावर नवी साडी नेसविलेली होती़ त्याने कोमलला लिपस्टिक लावून गळ्यात मंगळसुत्र घातले होते़.  सहायक पोलीस आयुक्त शिवाजी पवार, वरिष्ठ पोलीस निरीक्षक विष्णु जगताप व त्यांच्या सहकाऱ्यांनी घटनास्थळी भेट दिली़ राहुल हंडाळ याचा पोलीस शोध घेत आहेत़  किरकोळ कारणावरुन पतीने पत्नीला मारहाण करुन तिचा खुन केल्याची आणखी एक घटना धनकवडीतील चव्हाण पॅलेस येथे घडली़ एकाच दिवस पतीने पत्नीचा खुन केल्याच्या दोन घटनेने एकच खळबळ उडाली आहे़