गंगाखेड नगराध्यक्षांना बांधकाम परवान्याच्या वादातून माजी नगराध्यक्षाच्या मुलाची मारहाण

अभियंत्याला मोजणी करण्यासाठी का पाठविले? याच वादातून ही मारहाण झाली. 

ठळक मुद्देगंगाखेड शहरात चौधरी यांच्या दुकानांचे बांधकाम सुरू आहे. बांधकाम अभियंत्याने बांधकामस्थळी जाऊन मोजणी केली.

गंगाखेड (जि. परभणी ) : येथील  काँग्रेसचे नगराध्यक्ष विजयकुमार तापडिया यांना काँग्रेसच्याच माजी नगराध्यक्षा अलका चौधरी यांच्या मुलाने मारहाण केल्याची घटना ८ मे रोजी सायंकाळी ७.३० वाजण्याच्या सुमारास घडली आहे. या प्रकरणात गुरुवारी दुपारी १२ वाजण्याच्या सुमारास गुन्हा नोंद करण्याची प्रक्रिया सुरू होती.

गंगाखेड शहरात चौधरी यांच्या दुकानांचे बांधकाम सुरू आहे. त्यासाठी बांधकाम परवान्याचा आॅनलाईन अर्ज त्यांनी केला होता. त्यावर बांधकाम अभियंत्याने बांधकामस्थळी जाऊन मोजणी केली. अभियंत्याला मोजणी करण्यासाठी का पाठविले? याच वादातून ही मारहाण झाली. 

माजी नगराध्यक्ष अलका चौधरी यांचे चिरंजीव सुशांत रविकांत चौधरी, बाळासाहेब रविकांत चौधरी, काँग्रेसचे शहराध्यक्ष शेख युनूस यांच्यासह पाच ते सहा जण ८ मे रोजी सायंकाळी ७.३० वाजण्याच्या सुमारास नगराध्यक्ष विजयकुमार तापडिया यांच्या कार्यालयात आले. बांधकामाचे मोजमाप करण्यासाठी अभियंत्याला का पाठविले? या कारणावरुन तापडिया यांना थापड-बुक्क्यांनी मारहाण करुन जिवे मारण्याची धमकी दिली, असल्याची माहिती मिळाली.

घटनेनंतर विजयकुमार तापडिया हे तक्रार देण्यासाठी रात्री पोलीस ठाण्यात गेले होते. त्यांनी तक्रार अर्जही दिला. मात्र उपचार घेऊन येतो, त्यानंतर सकाळी तक्रार देतो, असे सांगून त्यांनी तक्रार अर्ज वापस घेतला. तशी नोंद ठाण्याच्या स्टेशन डायरीत झाली आहे. दुपारी १२ वाजण्याच्या सुमारास या प्रकरणी तक्रार नोंदविण्याची प्रक्रिया सुरू झाली आहे.