हनी सिंगला गँगस्टर गोल्डी ब्रारने दिली जीवे मारण्याची धमकी, हनीने केली सुरक्षेची मागणी

गँगस्टर गोल्डी ब्रार सिद्धू मुसेवाला हत्याकांडातील मुख्य आरोपी आहे. तो लॉरेन्स विश्नोईसोबत भारतात गँग चालवतो.

Honey Singh death threat: प्रसिद्ध रॅपर-सिंगर हनी सिंगला (Honey Singh) गँगस्टर गोल्डी ब्रारने जीवे मारण्याची धमकी दिली आहे. कॅनडामध्ये बसलेल्या कुख्यात गोल्डीने व्हॉईस नोट पाठवून धमकी दिली आहे. धमकी मिळाल्यानंतर हनी सिंगने दिल्लीपोलिसांच्या स्पेशल सेलकडे तक्रार केली आहे. सध्या पोलिसांनी तपास सुरू केला आहे.

हनी सिंगने सांगितले की, मला आणि माझ्या सहकाऱ्यांना गोल्डी ब्रारच्या नावाने धमकी दिली आहे. मी पोलिस आयुक्तांना भेटलो आणि त्यांना मला सुरक्षा पुरवण्याची विनंती केली आहे. मला खूप भीती वाटत आहे. माझ्या आयुष्यात पहिल्यांदाच असं काही घडत आहे. माझे संपूर्ण कुटुंब घाबरले आहे. मी मृत्यूला खूप घाबरतो, त्यामुळे मी सुरक्षा देण्याची विनंती केली आहे, अशी माहिती हनीने दिली. 

कोण आहे गोल्डी ब्रार?

गोल्डी ब्रार हा पंजाबमधील प्रसिद्ध गायक सिद्धू मूसवाला हत्याकांडातील मुख्य आरोपी असून, सध्या फरार आहे. गोल्डी ब्रारचे पूर्ण नाव सतविंदरजीत सिंग आहे. त्यांचे कुटुंब मुक्तसर साहिबचे असून, तिथेच त्याचा 1994 मध्ये जन्म झाला. त्याने यापूर्वी बॉलिवूड स्टार सलमान खानलाही जीवे मारण्याची धमकी दिली होती. या वर्षी मार्चमध्ये त्याने सलमान खानला ईमेल पाठवून धमकी दिली होती. त्या धमकीनंतर पोलिसांनी सलमान खानच्या घराची सुरक्षा वाढवली.

तो सध्या कॅनडातून संपूर्ण टोळी चालवत असून, लॉरेन्स बिश्नोईचा जवळचा सहकारी मानला जातो. ब्रार विरुद्ध खून, हत्येचा प्रयत्न आणि खंडणी यांसारखे अनेक गुन्हे दाखल आहेत. त्याच्या विरोधात अजामिनपात्र अटक वॉरंट जारी करण्यात आले आहे. एनआयएने त्याच्यावर यूएपीए अंतर्गत गुन्हा दाखल केला आहे. गोल्डी ब्रार आणि गँगस्टर लॉरेन्स बिश्नोई पंजाब, दिल्ली, राजस्थान, यूपी, हरियाणा येथे त्यांचे नेक्सस चालवतात.