वडाची झाडे लाउन चिल्लर पार्टीतर्फे वटपौर्णिमा

साळोखेनगरात वृक्षारोपण

 आॅनलाईन लोकमत

कोल्हापूर, दि. 0९ : केवळ महिलांनीच वटपौर्णिमा का करावी, साताजन्माची साथ देण्याची मनोकामना करणाऱ्या महिलांना साथ देण्यासाठी पुरुषांनीही प्रयत्न केले पाहिजेत, या भूमिकेतून कोल्हापुरातील चिल्लर पार्टी विद्यार्थी चळवळीच्या सदस्यांनी गुरुवारी साळोखेनगर परिसरात वडाची रोपे लावून आगळीवेगळी वटपौर्णिमा साजरी केली. शहरात पर्यावरणपूरक उपक्रमांनी विविध संस्थांनीही गुरुवारी वटपौर्णिमा साजरी करण्यात आली.

चिल्लर पार्टी विद्यार्थी चळवळीमार्फत बालचित्रपट, पुस्तक विकत घेउन वाचा यासारख्या उपक्रमासोबतच निसर्ग संवर्धनाचे कामही वर्षभर सुरु असते. गेल्याच महिन्यात शाहूवाडी तालुक्यातील आंबा परिसरातील जंगलातील मुजलेले नैसर्गिक पाण्याचे स्त्रोत चिल्लर पार्टी विद्यार्थी चळवळीच्या सदस्यांनी श्रमदानाने खुले केले होते.

वटपौर्णिमेनिमित्त गुरुवारी साळोखेनगर परिसरातील माळरानावर चिल्लर पार्टीच्या सदस्यांनी वडाची रोपे लावली. या उपक्रमात मिलिंद यादव, मिलिंद कोपार्डेकर, अभय बकरे, विजय शिंदे, श्रीराम जाधव यांनी भाग घेतला.