कडबा विकल्याच्या रागातून बापानेच केला लेकाचा खून

बापास पोलिसांनी अटक केली असून त्याची कसून चौकशी केली जात आहे. 

आडगाव रंजे (जि. हिंगोली) : वसमत तालुक्यातील गुंडा येथे बापानेच लेकाचा खून केल्याची खळबळजनक घटना ९ मार्च रोजी सकाळी १०.३० वाजेच्या सुमारास घडली. आरोपी बापास पोलिसांनी अटक केली असून त्याची कसून चौकशी केली जात आहे. 

सविस्तर माहिती अशी की वसमत तालुक्यातील गुंडा शेत शिवारातील कॅनॉलच्या परिसरामध्ये शनिवारी सकाळी १०.३० वाजेच्या सुमारास ऊद्धव सखाराम खिल्लारे (३२) याच्यासोबत त्याचे वडिल सखाराम खिल्लारे याने ‘शेतातील कडबा का विकतो’ या कारणावरून वाद घालत डोक्यात रूमनाने मारहाण केली. मारहाणीत उद्धव खिल्लारे याच्या डोक्यात जबर मार लागल्याने तो गंभीर जखमी होऊन जागीच गतप्राण झाला. 

सदर घटनेची माहिती पोलिसांना मिळताच काही वेळातच पोलीस घटनास्थळी दाखल झाले. यावेळी बघ्यांची मोठी गर्दी जमली होती. घटनास्थळी हट्टा पोलीस ठाण्याचे सपोनि गुलाब बाचेवाड डी.एन.मुलगीर तसेच जमादार जीवन गवारे, बबन राठोड, ईम्रान सिद्दीकी, शेख नय्यर, गणेश लेकुळे, संदीप बोचरे आदी घटनास्थळी पोहचले. पोलिसांनी सदर घटनेचा पंचनामा करून  प्रेत शवविच्छेदनासाठी वसमत येथील ग्रामीण रुग्णालयात पाठविण्यात आले.

याबाबत मयताचे वडील सखाराम यादव खिल्लारे (६०) रा. गुंडा ता.वसमत यास ताब्यात घेण्यात आले आहे. याप्रकरणी रात्री उशिरापर्यंत गुन्हा दाखल करण्याची प्रक्रिया सुरू होती. घटनास्थळी पोलीस उपअधीशक मुदीराज यांनीही भेट देऊन पाहणी केली. गावात खून झाल्याच्या  घटनमुळे खळबळ उडाली आहे.