जिल्हा वकील संघाची शहर पोलीसवर मात

गोलंदाजांनी केलेल्या सुरेख कामगिरीनंतर औरंगाबादचा दिग्गज शैलीदार फलंदाज पंकज फलके याच्या स्फोटक फलंदाजीच्या बळावर जिल्हा वकील सीनिअर संघाने गरवारे क्रीडा संकुलाच्या क्रिकेट मैदानावर सुरू असलेल्या ६ व्या राम-कमला औद्योगिक टष्ट्वेंटी-२० क्रिकेट स्पर्धेत शहर पोलीस ब संघावर दहा गडी राखून दणदणीत विजय मिळवला.

औरंगाबाद : गोलंदाजांनी केलेल्या सुरेख कामगिरीनंतर औरंगाबादचा दिग्गज शैलीदार फलंदाज पंकज फलके याच्या स्फोटक फलंदाजीच्या बळावर जिल्हा वकील सीनिअर संघाने गरवारे क्रीडा संकुलाच्या क्रिकेट मैदानावर सुरू असलेल्या ६ व्या राम-कमला औद्योगिक टष्ट्वेंटी-२० क्रिकेट स्पर्धेत शहर पोलीस ब संघावर दहा गडी राखून दणदणीत विजय मिळवला. पंकज फलकेच या सामन्यात सामनावीर किताबाचा मानकरी ठरला.
शहर पोलीसने प्रथम फलंदाजी करताना २० षटकांत ८ बाद ११५ धवा केल्या. त्यांच्याकडून सिद्धांत जी. याने २९ चेंडूंत २ चौकार व २ षटकारांसह ३६ धावा केल्या. पंकज दळवीने ४ चौकारांसह १९, शेख अलीमने १ षटकार व एका चौकारांसह १७, रिझवान अहमदने १४ व ज्ञानेश्वर वानखरे याने नाबाद ११ धावा केल्या. जिल्हा वकील संघाकडून उदय पांड याने ३० धावांत ३ गडी बाद केले. त्याला अभिलेष पवारने १३ धावांत आणि पंकज फलकेने २० धावांत प्रत्येकी २ गडी बाद केले. गोपाल पांडेने २३ धावांत १ गडी बाद केला. प्रत्युत्तरात जिल्हा वकील सीनिअर संघाने विजयी लक्ष्य १५ षटकांत एकही गडी न गमावता गाठले. त्यांच्याकडून शैलीदार फलंदाज पंकज फलके याने चौफेर टोलेबाजी करताना अवघ्या ५५ चेंडूंतच नाबाद ७५ धावा फटकावल्या. त्याला संदीप गायकवाडने ३५ चेंडूंत ३ चौकारांसह नाबाद ३० धावा काढून साथ दिली.