विहिरीत तरुणीचा मृतदेह; हत्या की आत्महत्या ?

एक्स्प्रेस हायवेच्या जुन्या टोलनाक्याजवळील विहिरीत एका ३० वर्षीय तरुणीचा मृतदेह फुगलेल्या अवस्थेत शुक्रवारी आढळून आला.

ठळक मुद्देएक्स्प्रेस हायवेवरील जुन्या टोलनाक्याजवळील घटना : शवविच्छेदन अहवालाची प्रतीक्षा

आॅनलाईन लोकमत
अमरावती : एक्स्प्रेस हायवेच्या जुन्या टोलनाक्याजवळील विहिरीत एका ३० वर्षीय तरुणीचा मृतदेह फुगलेल्या अवस्थेत शुक्रवारी आढळून आला. तो मृतदेह काढत असताना विहिरीत सुसाइड नोट आढळून आली असली तरी ती आत्महत्या की हत्या हे अनुत्तरित आहे. सुसाइड नोटनुसार, आईच्या मानसिक त्रासाला कंटाळून त्या तरुणीने विहिरीत उडी घेऊन आत्महत्या केल्याचे प्रथमदर्शनी दिसून आले. तथापि, उशिरा रात्री ‘तो’ मृतदेह एका सामाजिक कार्यकर्तीचा असल्याची चर्चा शवागार परिसरात असल्याने प्रकरणाचे गूढ वाढले आहे.
शुक्रवारी दुपारी २ वाजताच्या सुमारास ही घटना उघड झाल्यानंतर गाडगेनगर पोलिसांनी अग्निशमनच्या मदतीने विहिरीतील मृतदेह बाहेर काढला. त्याचवेळी विहिरीच्या पाण्यात तरंगत असलेली चिठ्ठी पोलिसांनी बाहेर काढली. या चिठ्ठीत 'मी माझ्या आईच्या मानसिक त्रासाला कंटाळून आत्महत्या करीत आहे’ असे नमूद आहे. त्याला गाडगेनगर पोलिसांनी दुजोरा दिला आहे. टोलनाक्याजवळील मेनशा गार्डन नावाने ओळखल्या जाणाऱ्या शेतशिवारातील विहिरीत एका ३० ते ३५ वयोगटातील तरुणीचा मृतदेह तरंगत असल्याची माहिती शिवसेनेचे उपशहरप्रमुख अमोल निस्ताने यांनी सर्वप्रथम गाडगेनगर पोलिसांना दिली. त्यानुसार पोलीस उपनिरीक्षक बन्सोडे यांच्या पथकाने घटनास्थळ गाठून पंचनामा केला. पोलिसांनी अग्निशमनच्या मदतीने पाण्यात तरंगत असलेली एक चिठ्ठी व मृतदेह बाहेर काढला. मृत तरुणीने मृत्यूपूर्वी लिहिलेल्या चिठ्ठीतून आत्महत्येचे कारण स्पष्ट केले असले तरी ती चिठ्ठी त्याच तरुणीने लिहिली की मागाहून अन्य व्यक्तीने ती लिहून पाण्यात टाकली, याबाबत पोलिसांनी चौकशी आरंभली आहे.
तत्पूर्वी, मृतदेह इर्विनमधील शवविच्छेदन गृहात पाठवून पोलिसांनी ओळख पटविण्यासाठी तपोवन प्रभागातील नागरिकांची चौकशी केली. मात्र, त्या तरुणीला कुणीही ओळखत नव्हते. याबाबतची माहिती मिळताच नगरसेविका प्रमिला जाधव यांच्यासह मुरलीधर वाईकर व तपोवन प्रभागातील नागरिकांनी घटनास्थळी धाव घेतली.
तरुणीची हत्या करून तिला विहिरीत ढकलण्यात आले की तिने आत्महत्या केली, याबाबतचा संभ्रम कायमच होता. तो मृतदेह सामाजिक संघटनेच्या कार्यकर्तीचा असल्याची चर्चा सायंकाळपासून सुरू झाली. ज्या तरुणीचा हा मृतदेह असल्याचा दावा करण्यात आला आहे, तिची दुचाकी इर्विन चौकात तीन दिवसांपासून बेवारस पडली असून, तिचे दोन्ही मोबाईल क्रमांक बंद आहेत. हा घटनाक्रम लक्षात घेता त्या सामाजिक संघटनेच्या पदाधिकाऱ्यांशी संपर्क साधत असल्याची माहिती गाडगेनगर पोलिसांनी दिली.
विहिरीजवळच देहविक्रय व्यवसाय ?
एक्स्प्रेस हायवे स्थित टोलनाक्याजवळील विहिरीजवळ एक छोटी पडकी खोली आहे. त्या खोलीत देह व्यवसाय चालत असल्याचा आरोप परिसरातील नागरिकांना शुक्रवारी केला. या खोलीत कंडोमचा ढिगारा आढळून आल्याने त्या आरोपाला बळ मिळाले आहे. रात्री या ठिकाणी तरुण-तरुणी अश्लील कृत्य करत असल्याचा आरोप आहे.
‘तो’ मृतदेह सामाजिक संघटनेच्या पदाधिकाऱ्याचा?
दरम्यान विहिरीमध्ये आढळलेला ‘तो’ मृतदेह शहरातील एका सामाजिक संघटनेच्या महिला पदाधिकाऱ्याचा असल्याची चर्चा उशिरा रात्रीपर्यंत होती. ‘त्या’ पदाधिकारी महिलेच्या आई-वडिलांनीही शवविच्छेदनगृहात धाव घेऊन ओळख पटविण्याचा प्रयत्न केला. तथापि, उशिरा रात्रीपर्यंत पोलिसांनी ‘त्या’ ओळखीला दुजोरा दिला नाही.