स्वत:मधील संशोधक जागवा व यशस्वी व्हा

प्रत्येकात एक संशोधक लपलेला असतो. चिकित्सक पद्धतीने आपल्यातील सप्त संशोधक जागृत केला तर नवनवीन शोध लावता येतात. रुळलेल्या वाटेवरून आपण वाटचाल केली तर पारंपरिक

राजेश खवले : ‘आम्ही बी घडलो, तुम्ही बी घडाना’ कार्यक्रमाला उत्स्फूर्त प्रतिसादयवतमाळ : प्रत्येकात एक संशोधक लपलेला असतो. चिकित्सक पद्धतीने आपल्यातील सप्त संशोधक जागृत केला तर नवनवीन शोध लावता येतात. रुळलेल्या वाटेवरून आपण वाटचाल केली तर पारंपरिक ज्ञानापेक्षा वेगळे काहीच प्राप्त होणार नाही. असे प्रतिपादन निवासी उपजिल्हाधिकारी राजेश खवले यांनी केले.प्रयास-सेवांकुर अमरावती व्दारा प्ररीत प्रयास यवतमाळचा उपक्रम ‘आम्ही बी घडलो, तुम्ही बी घडाना’ या कार्यक्रमात रविवारी महेश भवनात ते बोलत होते. ते म्हणाले यशस्वी पुरूषांनी इतरांपेक्षा वेगळी आडवाट स्वीकारली असते, त्यामुळे त्यांनी कलेले काम सामान्य दिसत असले तरी वेगळ््या पद्धतीचे असते. प्राप्त परिस्थितीवर आपल्या पद्धतीने काढलेला तोडगा, वेळेचा सदुपयोग आणि कामाचा दर्जा असेल तर कोणीही यशस्वी होऊ शकतो असे प्रेरणादायी मार्गदर्शन निवासी उपजिल्हाधिकारी राजेश खवले यांनी केले. स्पर्धा परीक्षा संदर्भात विद्यार्थ्यांसाठी अत्यंत प्ररेक असा हा उपक्रम होता. डॉ. अविनाश सावजींच्या प्रश्नांना उत्तरे देत असतानाच राजेश खवले यांनी आपला जीवनपट उलगडून दाखविला. परिवारात शिक्षणाची पार्श्वभूमी नाही. गावात उच्च शिक्षणाची सोय नाही. औद्योगिक प्रशिक्षण संस्थेत इलेक्ट्रानिक्सची पदविका प्राप्त करून वडिलांच्या कापडाच्या दुकानाशेजारी टी.व्ही., टेपरेकॉर्डर दुरूस्तीचे दुकान थाटणारा माहोली जहागीरचा हा एक सामान्य मुलगा केवळ जिद्दीमुळे उपजिल्हाधिकारी होऊ शकला. अमरावतीच्या शिवाजी महाविद्यालयात शिकत असतानाच वादविवाद स्पर्धा, निबंध स्पर्धात भाग घेऊन मिळणाऱ्या बक्षीसांच्या पैशातून पुस्तके खरेदी करण्याचा छंद जडला. कला पदवीनंतर महाराष्ट्र लोकसेवा आयोगाची परीक्षा महाराष्ट्रात चवथा मेरीटने उत्तीर्ण करून मंत्रालयात सहायक म्हणून रूजू झाले. पुढे उपजिल्हाधिकारी म्हणून महाराष्ट्रातून दहावा मेरीट येण्याचा बहुमान प्राप्त झाला. अधिकाराच्या पदावर विराजमान झाल्यानंतर नवनिर्मितीची दारे बंद न करता सातत्याने वेगवेगळे प्रयोग करून स्वत:ला विकसित करण्याबरोबरच समाजालाही उपयुक्त ठरणारे उपक्रम त्यांनी सुरू ठेवले. स्वत:च्या शिक्षणासाठी ब्राह्मी या आकडेवारी लक्षात ठेवण्याच्या पद्धतीचा शोध लावला. निमॉनिक्स, अ‍ॅक्रेलिक, लिंक, पेग इत्यादी शास्त्रशुद्ध पद्धतीचा वापर केला. आणि आज तेच ज्ञान स्पर्धा परीक्षेत सहभागी होणाऱ्या विद्यार्थ्यांना विनामूल्य देण्यासाठी त्यांची धडपड सुरू आहे. स्पर्धा परीक्षेसाठी त्यांनी स्वतंत्र पुस्तके लिहिली असून, आनंदाचे डोही आनंद तरंग ही कार्यशाळा विनामूल्य घेतात. संकेतस्थळावरूनसुद्धा ते विद्यार्थ्यांना मार्गदर्शन करीत असतात. राजेश खवले यांनी विविध भाषा ग्रहण केल्या असून, मराठीत गझल करण्याचा छंद ते जोपासून आहेत. अधिकारी कसा असावा याचे उत्तम उदाहरण म्हणून त्यांचा उल्लेख करता येईल. कार्यक्रमाचे सूत्रसंचालन आणि आभार कमल बागडी यांनी केले. या कार्यक्रमाला युवकांची भरगच्च उपस्थिती होती. (सांस्कृतिक प्रतिनिधी)