यवतमाळ : विवाहित महिलेशी अनैतिक संबंध असणाऱ्या युवकाचा तिच्यासोबत वाद झाला. महिलेच्या तक्रारीवरून त्याला कारागृहात जावे लागले. तेथून जामिनावर बाहेर आल्यानंतर सुडाने पेटलेला तो तिच्या शोधात पुण्यातील हिंजवडी येथे पोहोचला. १२ जून रोजी त्याला प्रेयसीचे नातेवाईक मिळाले. त्यांच्याशी वाद झाला. यात त्याने दोघांवर चाकूने सपासप वार केले. यात एक भाऊ गंभीर जखमी झाला तर दुसऱ्याचा उपचारादरम्यान रुग्णालयात मृत्यू झाला. या गुन्ह्यातील आरोपीला यवतमाळ शहर पोलिसांनी शुक्रवारी अटक केली.
निखिल अशोक गेडाम (३०) रा. कुंभारपुरा कळंब चौक असे आरोपीचे नाव आहे. निखिलचे रा. गौरखेडा ता. परतवाडा येथील विवाहित महिलेशी प्रेमसंबंध जुळले. ही महिला पतीला सोडून १० महिने यवतमाळात निखिलसोबत वास्तव्याला होती. नंतर त्या दोघात वाद झाला. महिलेच्या तक्रारीवरून निखिलवर गुन्हा दाखल झाला. त्याला अटक झाली. निखिल बाहेर येताच त्याने तिचा शोध सुरू केला. परतवाडा तालुक्यातील तिच्या मूळगावी निखिलने चौकशी केली. तेव्हा ती व तिचा पती पुणे येथे कामाला असल्याची माहिती मिळाली. तिच्या शोधात निखिल पुण्यातील हिंजवडी परिसरातील गवारे वस्ती येथे पोहोचला. ज्या नातेवाइकाच्या शेजारी महिला व तिचा पती राहत होता.
त्यांच्याकडे निखिलने चौकशी केली. या दरम्यान संतापलेल्या निखिलने अंकज प्रदीप तायडे (२९) याच्या छातीवर चाकूने वार केला. अंकजचा आरडाओरडा ऐकून त्याचाभाऊ पंकज खोलीतून बाहेर आला. त्याच्यावरही निखिलने चाकूने वार केले. पंकजच्या पोटावर चाकू भोसकल्यामुळे आतडे बाहेर आले. आरडाओरडा ऐकून परिसरातील नागरिक गोळा होताच निखिल तेथून पसार झाला. उपचारादरम्यान पंकज प्रदीप तायडे याचा रुग्णालयात मृत्यू झाला. या प्रकरणी अंकजच्या तक्रारीवरून हिंजवडी पोलिसांनी निखिल गेडामविरोधात खुनाचा गुन्हा व खुनाचा प्रयत्न केल्याचा गुन्हा दाखल केला.
या घटनेनंतर निखिल यवतमाळात परत आला. त्याच्या शोधात हिंजवडी पोलिस दोन दिवस यवतमाळात मुक्कामी होते. मात्र, निखिलचा सुगावा लागला नाही. त्यामुळे हिंजवडी पोलिसांचे पथक परत गेले. शुक्रवारी यवतमाळ शहर पोलिसांनी निखिलचा शोध घेऊन त्याला ताब्यात घेतले. आरोपी मिळाल्याची माहिती हिंजवडी पोलिसांना दिली. त्यांचे पथक आल्यानंतर त्याला ताब्यात दिले जाणार असल्याचे शहर ठाणेदार रामकृष्ण जाधव यांनी सांगितले.
ही कारवाई जमादार रावसाहेब शेंडे, प्रदीप नाईकवाडे, किरण पडघण, अभिषेक वानखडे, पवन नांदेकर, प्रदीप कुरडकर यांनी केली.