खुद्द आरोग्य विभागातच सोशल डिस्टन्सिंगला फाटा

कोरोना प्रतिबंधासाठी सील केलेल्या भोसा परिसरातील सर्वेक्षणाच्या निमित्ताने हा प्रकार घडला हे विशेष. आठ कोरोना पॉझिटिव्ह व्यक्तींचा काही दिवस वावर असल्याने भोसा परिसर सील करण्यात आला आहे. आता तेथील ३३ हजार लोकसंख्येचा आरोग्य सर्व्हे करण्यासाठी पथके दररोज पाठविली जात आहे. मात्र पथकातील आरोग्य कर्मचाऱ्यांना विश्राम मिळावा यासाठी आता या पथकात पालिका शिक्षकांचा समावेश करण्यात आला.

ठळक मुद्देगर्दीत मार्गदर्शन : सर्वेक्षणाला आलेले गुरुजी तासभर ‘टीएचओ’ कार्यालयात ताटकळले

लोकमत न्यूज नेटवर्क
यवतमाळ : सर्वसामान्यांना कोरोनापासून वाचविण्याची जबाबदारी असलेल्या आरोग्य कार्यालयानेच कोरोनासारख्या संकटाला ‘हलक्यात’ घेतल्याचा प्रकार शुक्रवारी समोर आला. तब्बल शंभर शिक्षकांना एकत्र बसवून मार्गदर्शनाचा हातखंडा वापरणाऱ्या तालुका आरोग्य अधिकारी कार्यालयाने सोशल डिस्टन्सिंगचा अक्षरश: फज्जा उडविला.
कोरोना प्रतिबंधासाठी सील केलेल्या भोसा परिसरातील सर्वेक्षणाच्या निमित्ताने हा प्रकार घडला हे विशेष. आठ कोरोना पॉझिटिव्ह व्यक्तींचा काही दिवस वावर असल्याने भोसा परिसर सील करण्यात आला आहे. आता तेथील ३३ हजार लोकसंख्येचा आरोग्य सर्व्हे करण्यासाठी पथके दररोज पाठविली जात आहे. मात्र पथकातील आरोग्य कर्मचाऱ्यांना विश्राम मिळावा यासाठी आता या पथकात पालिका शिक्षकांचा समावेश करण्यात आला.
शुक्रवारी शिक्षकांचा पहिला दिवस असल्याने सर्वेक्षणाला जाण्यापूर्वी त्यांना सकाळी ९ वाजता तालुका आरोग्य अधिकारी कार्यालयात बोलावण्यात आले. मात्र खुद्द आरोग्य कार्यालयातील कर्मचारीच १० वाजता आले. शंभर शिक्षक एकाच वेळी आल्यावर ते तासभर ताटकळत राहिले. यावेळी सोशल डिस्टन्सिंगचा कोणताही निकष पाळण्यात आला नाही. १० वाजता आवारात उभे ठेवून शिक्षकांना सर्व्हेबाबत मार्गदर्शन करण्यात आले. मात्र यावेळीही शंभर शिक्षक अक्षरश: एकमेकांना चिटकून उभे होते. आरोग्य कार्यालयातच हा प्रकार सुरू असताना कोणीही सोशल डिस्टन्सिंगची साधी आठवणही काढली नाही, हे विशेष.

सध्या ५० शिक्षक वापरणार, ५० जणांना विश्राम
कोरोना सर्व्हेक्षणासाठी सेवा अधिग्रहित केलेल्या १०० पैकी ५० शिक्षकांना १८ ते २२ मेपर्यंत सहभागी केले जाणार आहे. तर ५० आरोग्य कर्मचाºयांना या काळात विश्राम दिला जाणार आहे. २२ मे नंतर उर्वरित ५० शिक्षकांना सर्व्हेसाठी वापरले जाण्याची शक्यता आहे.