यशाच्या क्षणी गमावला आधारस्तंभ ! लेकीच्या स्वप्नांना वडिलांचा साक्षीभाव नशिबी आला नाही!

सामाजिक सेवक वडिलांचा हृदयविकाराच्या झटक्याने मृत्यू : गावातील आनंदाचे दुःखात रूपांतर

यवतमाळ : यूपीएससीचा निकाल लागला आणि भरगोस यश मिळवलेल्या लेकीचे आयुष्य बदलले.. पण दुसऱ्याच क्षणी आयुष्याने अशी कलाटणी घेतली की आनंदाश्रूंनी भरून आलेले डोळे दुःखाच्या महासागरात कायमचे ओले झाले. मोहिनी खंदारे हीने नुकताच लागलेल्या यूपीएससीच्या परीक्षेत ८४४ वा रँक पटकावला. सगळीकडून शुभेच्छांचा वर्षाव आणि स्वागत होत असतांनाच वडील निवृत्त विस्तार अधिकारी प्रल्हाद खंदारे यांचा हृदयविकाराच्या झटक्याने मृत्यू झाला. त्यांच्या कन्येने, संपूर्ण गावाचा अभिमान वाढवत यूपीएससी परीक्षा यशस्वीरीत्या उत्तीर्ण केली होती पण तिच्या यशात ते कायमस्वरूपी राहू शकले नाहीत. 

परीक्षेचा निकाल काही दिवसांपूर्वीच जाहीर झाला होता आणि मोहिनीला मिळालेल्या उंच स्थानामुळे संपूर्ण गावात जल्लोषाचं वातावरण होतं. आपली मुलगी देशातील सर्वात कठीण स्पर्धा परीक्षा उत्तीर्ण झाली म्हणून खंदारे अत्यंत भावूक व आनंदित होते. सगळे नातेवाईक, शेजारी आणि गावकरी एकत्र येऊन ही ऐतिहासिक कामगिरी साजरी करत होते.

मुलीच्या यशाबद्दल अभिनंदन स्वीकारताना, अचानक प्रल्हाद खंदारे जमिनीवर कोसळले. त्यांना तात्काळ जवळच्या रुग्णालयात नेण्यात आलं, पण डॉक्टरांनी त्यांना मृत घोषित केलं. प्राथमिक तपासणीनुसार त्यांना तीव्र हृदयविकाराचा झटका आला होता.

मोहिनीच्या अथक परिश्रमाचं फळ मिळालं असलं तरी वडिलांच्या अचानक निधनामुळे तिच्या यशाला एक काळोखाची किनार लाभली. ज्यांच्या पाठबळामुळे तिचं स्वप्न साकार झालं, त्या वडिलांचं असं निघून जाणं गावासाठी आणि कुटुंबासाठी शोकांतिका बनली.

प्रल्हाद खंदारे यांनी आपल्या सामाजिक सेवेतून आणि कुटुंबासाठी केलेल्या समर्पणातून संपूर्ण गावाचा आत्मविश्वास उंचावला होता. त्यांच्या निधनामुळे आनंदात असलेलं गाव दुःखात बुडालं आहे.