रेसलिंग स्पर्धा घेणारी डब्ल्यूडब्ल्यूई भलत्याच हट्टाला पेटली आहे. इराण विरुद्ध इस्रायल, अमेरिका युद्धाच्या सावटाखाली काहीही झाले तरी त्यांना नाईट ऑफ चॅम्पिअन्स स्पर्धा सौदी अरेबियामध्येच घ्यायची आहे. येत्या २८ जूनला ही स्पर्धा रिदायच्या एरिनामध्ये खेळविली जाणार आहे. एवढेच नाही तर डब्ल्यूडब्ल्यूई स्मॅकडाऊनचा इव्हेंटही एरिनामध्येच २७ जूनला घेतला जाणार आहे.
मध्य पूर्वेमध्ये तणाव प्रचंड प्रमाणात वाढला आहे. इस्रायल आणि अमेरिका एका मुस्लिम राष्ट्रावर हल्ला करत आहेत, यामुळे मुस्लिम देशही संतापलेले आहेत. यामुळे अनेक लोकांनी या भागात होणारा WWE चा कार्यक्रम रद्द करण्याची मागणी केली होती. एवढेच नाही तर युके सरकारने या देशांत प्रवास करण्याचे टाळण्याचे देखील सांगितलेले आहे. तरी देखील डब्ल्यू डब्ल्यू ई आपल्या ठरलेल्या कार्यक्रमानुसार पुढे जात आहे.
कंपनीनुसार ते परिस्थितीवर लक्ष ठेवून आहेत. सौदीमध्येच आधीच्या नियोजनानुसार कार्यक्रम होणार आहे. अमेरिकेने आपला विश्वासघात केल्याचे म्हणणे इराणचे आहे. अमेरिकेने १५ दिवसांची मुदत दिलेली होती, परंतू दोनच दिवसांनी हल्ले चढविले. त्यापूर्वी अण्वस्त्र कार्यक्रमावर चर्चा सुरु असताना इस्रायलने हल्ले चढविले होते. यामुळे आता इराण दोन्ही देशांना कायमचा धडा शिकविण्याची भाषा करत आहे. सौदी अरेबिया इस्रायल आणि इराणच्या आसपास आहे. यामुळे तिथे विमानांनी जाणे आणि कार्यक्रम घेणे खूप जोखमीचे आहे. WWE चे आंतरराष्ट्रीय स्तरावरील चाहते देखील या स्पर्धेला येणार आहेत. मिसाईल हल्ल्यांमुळे विमाने पाडली जाण्याची भीती देखील आहे. अमेरिकेच्या परराष्ट्र विभागानेही आपल्या नागरिकांना सावध राहण्याच्या सूचना केल्या आहेत. ब्रिटन सरकारने आपल्या नागरिकांना सौदी अरेबियाला न जाण्याचा सल्ला दिला आहे.
WWE नुसार ही स्पर्धा स्थगित किंवा रद्द केली जाणार नाही. कारण रॉयल रंबल कार्यक्रम देखील २०२६ मध्ये सौदी अरेबियामध्येच होणार आहे. सौदी अरेबिया जगातील सर्वात सुरक्षित ठिकाणांपैकी एक असल्याचे कंपनीचे म्हणणे आहे.