अवलिया महाराजांची यात्रा रद्द

नागपूर-औरंगाबाद महामार्गावरील काळामाथा येथील श्री संत योगी अवलिया महाराज संस्थान नवसाला पावणारा देव म्हणून पंचक्रोशीतच नव्हे संपूर्ण विदर्भात प्रसिध्द आहे. या संस्थानमध्ये माघ शुध्द पौर्णिमेला भव्य यात्रेचे आयोजन केले जाते. राज्याच्या कानाकोपऱ्यातून लाखो भाविक दर्शनासाठी यात्रेत नवस फेडण्यासाठी येतात, तसेच पोळ्याच्या दुसऱ्या दिवसी अर्थात करीदिनालाही येथे मोठी यात्रा भरते. या दिवशीही दूरवरून मोठ्या संख्येने भाविक बैलावर आपली द्वारका घेऊन येतात व आपला नवस पूर्ण करतात, परंतु कोरोना संसर्गामुळे मागीलवर्षी प्रशासनाने सर्वच यात्रोत्सवांवर मर्यादा लावल्या आहेत. अद्यापही कोरोनाचे संकट टळले नसल्यामुळे शासन व प्रशासनाने सर्वच धार्मिक, सामाजिक कार्यक्रमावर बंदी असल्यामुळे काळामाथा येथील करी दिनाला भरणारी यात्रा रद्द करण्यात आल्याची माहिती संस्थानच्या वतीने प्रसिध्दी पत्रकाव्दारे देण्यात आली आहे. त्यामुळे अवलिया महाराजांच्या भक्तानी दर्शनासाठी अथवा व्दारका घेऊन मंदिरावर येऊ नये. आपल्या घरीच राहून उत्सव साजरा करावा, असे आवाहन संस्थानचे अध्यक्ष रामेश्वरआप्पा गोंडाळ, उपाध्यक्ष उत्तमसिंग राठोड यांचेसह सर्व विश्वस्त मंडळातर्फे करण्यात आले आहे.