बाबासारखे पोलीस, डॉक्टर होणार का; मुलांनी भरला होकार!

लोकांना मृत्यूच्या दाढेतून बाहेर काढणाऱ्या डाॅक्टरांना ईश्वराचे रूप मानले जाते. कोरोनाच्या संकटकाळात त्याची अनेकांना प्रचिती येत आहे. सकाळपासून रात्री उशिरापर्यंत दवाखान्यात हजर राहून रुग्णांची सेवा करणाऱ्या डाॅक्टरांना कुटुंबास, मुलांना पुरेसा वेळ देता येणे सध्यातरी अशक्य झाले आहे. तशीच परिस्थिती पोलीस अधिकारी व कर्मचाऱ्यांची असून, कोरोनाची साखळी तोडण्याकरिता अवलंबिण्यात येत असलेल्या विविध उपाययोजनांची अंमलबजावणी करण्याची चोख जबाबदारी पोलीस कर्मचारी पार पाडत आहेत. गेल्या काही दिवसांपासून त्यांच्या कामांचे तासही वाढवून देण्यात आले आहेत. यामुळे संबंधितांना कुटुंबापासून अधिकांशवेळ दुर राहावे लागत आहे. या पार्श्वभूमीवर भविष्यात तुम्हीही पोलीस, डाॅक्टरच होणार का, असा सवाल त्यांच्या मुलांना केला असता, वडील जनसेवेत रात्रंदिवस काम करत असल्याने आम्हीसुद्धा डॉक्टर व पोलीसच होऊन लोकांची सेवा करू, इशी इच्छा मुलांनी व्यक्त केली.

..........................

३५

कोरोनायोद्धे शासकीय रुग्णालयातील डाॅक्टर

१५०

आरोग्य कर्मचारी

९२

पोलीस अधिकारी

१३९८

पोलीस कर्मचारी

..........................

पोलीस व्हायला निश्चित आवडेल

माझ्या वडिलांचा मला अभिमान आहे. जनतेची सेवा करण्यासाठीच ते पोलीस झाले, हे त्यांनी मला वेळोवेळी सांगितले आहे. त्यामुळे ते मला पुरेसा वेळ देत नाहीत, याबाबत माझी कुठलीच तक्रार नाही. ते लोकांच्या सुरक्षेसाठी तैनात आहेत. मी देखील भविष्यात पोलीस दलात मोठा अधिकारी होण्याचे स्वप्न बाळगले आहे.

- अश्वजित विजय अरखराव

.................

माझी आई पोलीस असल्याने तिला कर्तव्य पार पाडण्याकरिता नेहमीच घराबाहेर राहावे लागते. कधीकधी तर जेवत असतानाच तिला फोन येतो. अशावेळी ती जेवण अर्ध्यावर सोडून निघून जाते. कामामुळे तिला मला पुरेसा वेळ देता येत नाही. त्यामुळे मला भविष्यात पोलीस नाही; तर वैज्ञानिक व्हायचे आहे.

- वेदांत मुरलीधर उत्तरवार

...................

माझे वडील पोलिसांत असून ते सदैव जनतेच्या रक्षणासाठी तत्पर असतात. कामाच्या धावपळीत मला त्यांना पुरेसा वेळ देता येत नाही म्हणून काय झाले? आधी कर्तव्य; नंतर कुटुंब, ही त्यांची भूमिका आहे आणि ती मला मान्य आहे. मी सुद्धा भविष्यात पोलीसच होणार आहे.

- तेजस रवी खडसे

...............................

कोरोना असेल तरी डाॅक्टरच होणार

माझी आई प्राथमिक आरोग्य केंद्रात औषध निर्माता अधिकारी आहे. गेल्या वर्षभरापासून तिचा कोरोना रुग्णांशी जवळचा संबंध येत आहे. गेल्या काही दिवसांत तिचे कामही वाढले आहे; पण तिच्या चेहऱ्यावर ते कधी दिसत नाही. रुग्णसेवा हीच ईश्वरसेवा असल्याचे तिचे म्हणणे आहे. मला भविष्यात डाॅक्टरच व्हायचे आहे.

- समर्थ अतुल ताठे

............

कोरोना विषाणू संसर्गाच्या संकटामुळे सर्वच ठिकाणी हाहाकार उडाला आहे. अशा स्थितीत रुग्ण डाॅक्टरांकडे नाही तर कुठे जाणार? माझे बाबा डाॅक्टर असून, या काळात त्यांच्या कामाचे तास वाढले आहेत. ते सतत रुग्णांची इमानेइतबारे सेवा करीत आहेत. मी पण भविष्यात डाॅक्टरच होणार.

- आदित्य शिवाजी सावळे

.................

कोरोनामुळे रुग्णांची संख्या वाढल्यामुळे मला अधिक वेळ दवाखान्यात राहावे लागणार असल्याचे बाबांनी सांगितले आहे. घरी आल्यानंतर मात्र ते माझ्यासोबत खेळतात, मला भरपूर वेळ देतात. लोकांची सेवा केल्याने देव भरभरून देतो, असे त्यांचे म्हणणे आहे. मी पण भविष्यात त्यांच्यासारखा डाॅक्टरच होणार आहे.

- अभीर प्रवीण ठाकरे

.............

कोट :

कोरोना विषाणू संसर्गाच्या संकटकाळात विशेषत: पोलीस कर्मचारी व डाॅक्टरांच्या कामाचे तास वाढलेले आहेत. ते त्यांच्या मुलांना अधिक वेळ देऊ शकत नाहीत. यामुळे मुलांमध्ये चिडचिड निर्माण होणे स्वाभाविक आहे; मात्र मुलांना विश्वासात घेऊन परिस्थितीची जाणीव करून दिली तर मुले बाबांची घालमेल निश्चितपणे समजू शकतात. कामासोबतच मुलांच्या आवडीनिवडी जपणे आवश्यक आहे.

- डाॅ. नरेश इंगळे

मानसोपचार तज्ज्ञ, वाशिम