वाशिम : कोरोना विषाणू संसर्गाचे संकट बहुतांशी निवळले आहे. त्यामुळे यापूर्वीच सुरू झालेल्या रेल्वेचा प्रवास आता पूर्वपदावर आला आहे. रेल्वेने प्रवास करणाऱ्यांच्या संख्येतही दिवसागणिक वाढ होत आहे. असे असताना मासिक पास सेवा मात्र अद्यापपर्यंत सुरू झालेली नाही. यामुळे नियमित ये-जा करणाऱ्यांना अधिकचा आर्थिक भुर्दंड सहन करावा लागत आहे. ही सुविधा नेमकी कधी सुरू होणार, असा सवाल संबंधितांमधून उपस्थित केला जात आहे.
कोरोना काळात वाशिममार्गे धावणाऱ्या सर्वच एक्स्प्रेस आणि पॅसेंजर रेल्वेचा प्रवास बंद करण्यात आला होता. कालांतराने कोरोनाचा प्रादुर्भाव कमी झाल्यानंतर एक्स्प्रेस आणि पॅसेंजरही पूर्वीप्रमाणे धावायला लागल्या. मात्र, मासिक पास सेवा अद्याप पूर्ववत झालेली नाही. यामुळे विशेषत: वाशिम ते हिंगोली, वाशिम ते अकोला नियमित ये-जा कराव्या लागणाऱ्यांची गैरसोय होत आहे. मासिक पास सेवा सुरू करावी, अशी मागणी त्यांच्यातून होत आहे.
..............
(बॉक्स)
सध्या सुरू असलेल्या रेल्वे
वाशिममार्गे सध्या दैनंदिन इंटरसिटी एक्स्प्रेस, डेमू पॅसेंजर यासह नागपूर-कोल्हापूर, नांदेड-अमृतसर, अमरावती-तिरुपती, श्रीगंगानगर-नांदेड यासह इतरही मार्गांवरील एक्स्प्रेस रेल्वेचा प्रवास पूर्ववत झाला आहे. नागरिकांच्या मनातून कोरोनाची भीती बहुतांश कमी झाल्याने रेल्वेच्या प्रवासी संख्येतही आता वाढ झाल्याचे दिसून येत आहे.
..............
(बॉक्स)
मुंबईत सवलत, आम्हाला का नाही?
मुंबईत कोरोना लसीचे दोन्ही डोस घेतलेल्या व्यक्तींना रेल्वे विभागाकडून मासिक पास दिला जात आहे. मात्र, वाशिम रेल्वे स्थानकावर ही सुविधा अद्यापपर्यंत सुरू झालेली नाही. त्यामुळे मुंबईत सवलत, आम्हाला का नाही, असा सवाल प्रवाशांमधून उपस्थित केला जात आहे.
..............
भुर्दंड किती दिवस सहन करायचा?
कामानिमित्त नेहमीच अकोला येथे जावे लागते. त्यासाठी रेल्वेचा प्रवास आर्थिकदृष्ट्या परवडणारा होता. मात्र, कोरोना काळात ही सुविधा ठप्प झाल्याने पर्यायी वाहनांत्रारे प्रवासावर अधिक खर्च झाला. आता हा प्रश्न सुटला; परंतु मासिक पासची सुविधा नसल्याने भुर्दंड किती दिवस सहन करायचा?
- सुनील इढोळे
....................
व्यवसायानिमित्त पूर्वीपासूनच अकोल्यातील व्यापाऱ्यांशी संबंध आहेत. तेथूनच माल आणावा लागतो. प्रवासाकरिता रेल्वेचा पर्याय सोयीस्कर आहे. मात्र, मासिक पास सुविधा अद्यापपर्यंत सुरू झालेली नाही. यामुळे जेव्हा काम असेल तेव्हा तिकिटाचे पैसे मोजून प्रवास करावा लागत आहे.
- सचिन खडसे
.......................
वाशिम ते अकोला हे अंतर ८० किलोमीटर आहे. रेल्वेद्वारे ते दीड तासात कापले जाते. यासह वाशिमला राहणे आर्थिकदृष्ट्या परवडत नाही. त्यामुळे अपडाऊन करीत आहे. पूर्वी रेल्वेची मासिक पास काढून कमी पैशांत काम व्हायचे. मात्र, कोरोनानंतर रेल्वेचा प्रवास सुरू होऊनही पासची सुविधा मिळाली नाही.
- गजानन बढे
......................
कोट :
कोरोनाच्या संकटानंतर काही दिवसांपासून रेल्वेचा प्रवास पूर्ववत करण्यात आला. रेल्वेची मासिक पास सुविधाही लवकरच पूर्वीप्रमाणे कार्यान्वित केली जाईल. प्रवाशांची गैरसोय टाळण्याकरिता रेल्वे विभागाने पूर्वीपासून ठोस पावले उचललेली आहेत. प्रवाशांनी सहकार्य करावे.
- एम.टी. उजवे, स्टेशन मास्तर, वाशिम