वाशिम तालुक्यातील उमरा जवळा सिंचन प्रकल्पाच्या पर्यायी रस्त्याच्या कामासाठी उमरा कापसे येथील शेतकरी स्व.रामधन कापसे यांची अर्धा एकर क्षेत्रापेक्षा अधिक शेतजमीन बाधित करण्यात आली. या बाधित जमिनीचा मोबदला मिळावा, म्हणून रामधन कापसे यांनी पाटबंधारे विभागाकडे रीतसर अर्ज केला, परंतु १२ वर्षे उलटली, तरी त्यांच्या मागणीची दखल घेण्यात आली नाही. रामधन कापसे यांचे चिरंजीव विनोद रामधन कापसे यांनीही वडिलोपार्जित शेतीमधून पर्यायी वाटेसाठी बाधित केलेल्या गट नं. १९/१ मधील जमिनीची संयुक्त मोजणी करून, तत्काळ पीक नुकसान भरपाईसह मोबदला द्या, अशी मागणी जलसंपदा मंत्री, मुख्यमंत्री, अप्पर मुख्य सचिव जलसंपदा विभाग मंत्रालय मुंबई, कार्यकारी अभियंता पाटबंधारे विभाग वाशिम, अधीक्षक अभियंता पाटबंधारे मंडळ वाशिम, जिल्हाधिकारी वाशिम, कार्यकारी संचालक विदर्भ पाटबंधारे विकास महामंडळ नागपूर यांच्याकडे केली आहे.
००००००००००
राज्यशासनापर्यंत तक्रारी करूनही दखल नाही...
गेल्या १२ वर्षांपूर्वी जवळा उमरा प्रकल्पामुळे पर्यायी रस्त्यासाठी जमीन बाधित केल्यानंतर शेतकऱ्याने जमिनीच्या माेबदल्यासाठी पाटबंधारे विभागाचे उंबरठे झिजविले. तेथे न्याय न मिळाल्याने जिल्हाधिकारी, आयुक्तस्तरावरही निवेदन दिले. तेथेही न्याय न मिळाल्याने राज्यशासनापर्यंत निवेदन, तक्रारी करूनही अद्याप शेतकऱ्याला न्याय मिळाला नाही.