मानोरा तालुक्यात मतदान प्रक्रिया शांततेत

मानोरा : तालुक्यातील २२ पैकी २१ ग्रामपंचायतींच्या सार्वत्रिक निवडणुकीसाठी शुक्रवारी मतदान प्रक्रिया पार पडली. सकाळी ७.३० वाजल्यापासून सायंकाळी ५.३० पर्यंत पार पडलेल्या मतदान प्रक्रियेदरम्यान युवक आणि दिव्यांगांसह वयोवृद्धांचाही मतदान प्रक्रियेत उत्साह दिसून आला. प्रशासनाकडून प्राप्त माहितीनुसार वृत्त लिहिस्तोवर मतदानाची टक्केवारी ५८.१४ होती.

तालुक्यातील कारखेडा, विठोली,वाई गौळ, गादेगाव, अजनी, गव्हा, तळप बुद्रुक, कोंडोली, आसोला, पारवा, सेवादास नगर, हिवरा बु, धामणी, शेंदुरजना आढाव, इंझोरी, गोंडेगाव, मोहगव्हाण, या गावांतील ग्रामपंचायतींचा कार्यकाळ गतवर्षी जून-जुलै महिन्यांत संपला होता. कोरोना विषाणू संसर्गाच्या पार्श्वभूमीवर राज्य निवडणूक आयोगाने या ग्रामपंचायतींच्या निवडणुका स्थगित करून प्रशासकांची नियुक्त प्रशासनाकडून करण्यात आली होती. दरम्यान, कोरोना संसर्गाचा प्रादुर्भाव कमी झाल्याने या ग्रामपंचायतीच्या निवडणुकीचा कार्यक्रम जाहीर करण्यात आला. त्यात मानोरा तालुक्यातील २२ ग्रामपंचायतींपैकी एक ग्रामपंचायत अविरोध झाली, तर उर्वरित २१ ग्रामपंचायतीच्या सार्वत्रिक निवडणुकीसाठी १५ जानेवारीला मतदान घेण्यात आले. मानोरा तालुक्यात निर्धारित वेळेनुसार सकाळी सात वाजून ३० मिनिटांनी प्रत्येक मतदान केंद्रावर प्रशासनाच्या चोख बंदोबस्तात शांततेत मतदान प्रक्रियेला सुरुवात झाली.

वृत्त लिहिस्तोवर ................................... टक्के मतदानाची नोंद झाली होती.

------------

पोलिसांचा चोख बंदोबस्त

तालुक्यात २१ ग्रामपंचायतीची निवडणूक शांततेत पार पाडण्यासाठी पोलीस अधीक्षक वसंत परदेशी यांच्या आदेशानुसार ठाणेदार शिशिर मानकर यांनी चोख बंदोबस्त ठेवला होता. यात पोलीस कर्मचाऱ्यांसह प्रत्येक केंद्रावर होमगार्डची नियुक्ती करण्यात आली होती. शिवाय भरारी पथकाने प्रत्येक मतदान केंद्राला भेटी देऊन मतदान प्रक्रियेचा आढावा घेतला.