व्हायरल सर्दी-तापाचे संकट; रुग्णालयांमध्ये वाढली मुलांची गर्दी!

वाशिम : वातावरणातील बदलामुळे लहान मुलांमध्ये सर्दी, ताप, खोकला आदी लक्षणे जाणवत असून, उपचारार्थ सरकारी रुग्णालयांप्रमाणेच खासगी हॉस्पिटलमध्येदेखील गर्दी होत असल्याचे दिसून येते.

गत काही दिवसांपासून वातावरणात बदल झाल्याने याचा विपरित परिणाम लहान मुलांच्या आरोग्यावर होत आहे. वातावरणात गारवा असल्याने सर्दी, खोकला, ताप, मलेरिया, डोकेदुखी, उलट्या होणे आदी लक्षणे मुलांमध्ये आढळून येत आहेत. कोरोनाच्या तिसऱ्या लाटेत मुलांना अधिक धोका असल्याची शक्यता वर्तविण्यात येत आहे. तुर्तास तरी कोरोनाची तिसरी लाट नसली तरी मुलांना सर्दी, खोकला, ताप आदी लक्षणे आढळून येत असल्याने पालकांची डोकेदुखी वाढली आहे. जिल्हा सामान्य रुग्णालयासह ग्रामीण रुग्णालयात तसेच खासगी बालरुग्णालयांमध्येही उपचार घेण्यासाठी लहान मुले मोठ्या संख्येने येत असल्याचे दिसून येते.

००००००००००००००००

...ही घ्या काळजी

वातावरणात गारवा असल्याने मुलांना फ्रिजमधील थंड पाणी प्यायला देऊ नये, दूषित पदार्थांचे सेवन टाळावे, स्वच्छता राखावी, भरपूर पाणी प्यावे, अतिथंड पदार्थांचे सेवन टाळावे, पौष्टिक आहार घ्यावा, आजार झालेल्या व्यक्तींशी संपर्क टाळणे या गोष्टी महत्त्वाच्या आहेत.

००००००००००००००

कोरोना नाही, डेंग्यू व मलेरियाचे संकट!

मुलांना सर्दी, ताप व खोकला असला तरी तुर्तास तरी कोरोनाची लक्षणे नाहीत. परंतु, मलेरिया व डेंग्यूसदृश लक्षणे आढळून येत असल्याने पालकांनी बालकांची अधिक काळजी घेणे गरजेचे ठरत आहे.

०००००००००००

रुग्णालय ओपीडीदाखल बालरुग्ण

जिल्हा रुग्णालय १२० ४०

कानडे हॉस्पिटल २०० ६०

बाहेती हॉस्पिटल १५० ४०

बाजड हॉस्पिटल १२० २५

परळकर हॉस्पिटल ११० २५

ईश्वरी हॉस्पिटल १०० १५

वानखेडे हॉस्पिटल ७० १०

..................................

कोट

वातावरणातील बदलामुळे सध्या लहान मुलांमध्ये सर्दी, ताप, खोकला, डोकेदुखी, उलट्या होणे आदी लक्षणे दिसून येत आहेत. परंतु, घाबरण्याचे काही कारण नाही. व्हायरल फिव्हरची लक्षणे आढळून येताच, तातडीने डॉक्टरांचा सल्ला घ्यावा. लवकर निदान व उपचार मिळाले तर आजार लवकर नियंत्रणात येऊ शकतो.

- डॉ. प्रवीण वानखेडे

बालरोगतज्ज्ञ, जिल्हा सामान्य रुग्णालय, वाशिम