जिल्ह्यात शिक्षक कार्य गौरव सप्ताह !

वाशिम : विद्यार्थ्यांच्या व्यक्तिमत्त्व विकासात महत्त्वाची भूमिका बजावणाऱ्या उपक्रमशील शिक्षकांच्या कार्याचा गौरव म्हणून शिक्षण विभागातर्फे शिक्षक कार्य गौरव सप्ताह (थँक ए टीचर) राबविण्यात येत आहे. ७ सप्टेंबरपर्यंत विविध उपक्रम घेण्यात येणार आहेत.

विद्यार्थ्यांच्या व्यक्तिमत्त्व विकासात शिक्षकांची अत्यंत महत्त्वाची भूमिका असते. त्यामुळे शैक्षणिक क्षेत्रात चांगली कामगिरी करणाऱ्या शिक्षकांचा गौरव केला जातो तसेच विद्यार्थीदेखील शिक्षकांविषयीच्या आपल्या भावना विविध उपक्रमांच्या माध्यमातून शिक्षकदिनी व्यक्त करीत असतात. सद्यस्थितीत कोविड- १९ प्रादुर्भावाच्या पार्श्वभूमीवर राज्यातील सर्व ठिकाणी शाळा नियमितपणे सुरू करता आलेल्या नाहीत. शैक्षणिक नुकसान होऊ नये म्हणून ऑनलाइन पद्धतीने तसेच दुर्गम भागात अनेक शिक्षकांनी प्रत्यक्ष विद्यार्थ्यांना घरी जाऊन, समूह मार्गदर्शन वर्ग आयोजित करून शिक्षणाचे धडे दिले. विविध मार्गाने विद्यार्थ्यांचे शिक्षण सुरू ठेवण्यासाठी आणि विद्यार्थी शिक्षणाच्या प्रवाहात टिकून राहण्यासाठी सातत्याने प्रयत्नशील असणाऱ्या शिक्षकांविषयी आदर व आभार व्यक्त करण्यासाठी शिक्षक दिनाचे औचित्य साधून दि. २ ते ७ सप्टेंबर या कालावधीत ‘थँक ए टीचर’ अभियानांतर्गत शिक्षक गौरव सप्ताह राबविला जात आहे. जिल्ह्यातही विविध उपक्रमातून शिक्षकांचा सत्कार करण्यात येणार आहे.

...

विद्यार्थ्यांसाठी विविध स्पर्धा, कार्यक्रम

सर्व व्यवस्थापनाच्या सर्व माध्यमांच्या शाळांमध्ये इयत्ता पहिली ते बारावीतील विद्यार्थ्यांसाठी निबंध लेखन, काव्य वाचन, काव्य लेखन, चित्रकला स्पर्धा, वक्तृत्व स्पर्धा आदी विविध स्पर्धा, कार्यक्रमांचे ऑनलाइन/ऑफलाइन पद्धतीने आयोजन करणे, या माध्यमातून शिक्षकांचा सन्मान केला जाणार आहे.

००००००

कोट बॉक्स

शिक्षक दिनाचे औचित्य साधून जिल्ह्यात शिक्षक कार्य गौरव सप्ताह राबविण्यात येत आहे. या माध्यमातून उपक्रमशील शिक्षकांचा सन्मान केला जाणार आहे.

-रमेश तांगडे

शिक्षणाधिकारी, वाशिम