समस्या निकाली काढा, अन्यथा उपोषण

कोंडोली येथील सुदाम तायडे, सोनबा शंबोळे, किशोर रूमकर, जनाबाई शिंगाडे, नंदा भवाड यांनी तहसीलदारांकडे सादर केलेल्या निवेदनात नमूद केले आहे की, मानोरा तहसील कार्यालयात तालुक्यातील नागरिकांना शासकीय कामे करून घेण्यासाठी नियमित ये-जा करावी लागते. त्यात महिला व मुलींचाही समावेश आहे. असे असताना तहसील कार्यालयात अद्यापपर्यंत सुसज्ज स्वच्छतागृह उभारण्यात आलेले नाही. यामुळे विशेषत: महिलांची कुचंबणा होत आहे. त्यामुळे प्राधान्याने लक्ष पुरवून स्वच्छतागृह उभारण्यात यावे, नक्कल विभागात सुटसुटीतपणा निर्माण व्हावा, संजय गांधी निराधार योजनेत पात्र अशिक्षित नागरिकांच्या वयाचा दाखला म्हणून आधार क्रमांकास मान्यता देण्यात यावी, घटस्फोटितांचे प्रश्न मार्गी लावण्यात यावे, कोंडोली येथे आगीत नुकसान झालेल्या नागरिकांना तथा महापुराने बाधित नागरिकांना तातडीने नुकसानभरपाई देण्यात यावी आदी मागण्या करण्यात आल्या आहेत. मागण्यांची पूर्तता न झाल्यास उपोषण करू, असा इशाराही देण्यात आला आहे.

.................

राठोड यांची मागणी बेदखल

कारखेडा येथील सामाजिक कार्यकर्ते शशिकांत राठोड यांनीही काही महिन्यांपूर्वी तत्कालीन तहसीलदार डॉ. सुनील चव्हाण यांच्याकडे तहसील कार्यालय परिसरात स्वच्छतागृह उभारण्यासंबंधी निवेदन दिले होते; मात्र त्याची कुठलीच दखल अद्यापपर्यंत घेण्यात आलेली नाही.